Wever-Croes den buki riba 10-10-10: Spera Hulanda recapacita y duna sosten corecto

ORANJESTAD – Prome minister Evelyn Wever Croes ta carga speransa cu Hulanda lo recapacita y mustra comprension pa cu e situacion (di e tres islanan (Aruba, Corsou y St Maarten) y duna e sosten corecto enbez di ta obra cu man duro. Asina e mandatario ta bisa entre otro den un publicacion cu a keda lansa oficialmente e siman aki relaciona cu 10 aña status aparte di Corsou y St Maarten. Aki ta unda cu el a referi e.o. na e situacion actual cu Aruba ta tratando cu Hulanda.Mester remarca cu fuera di Wever Croes, Glenn Thode y ex prome minister Mike Eman tambe a contribui cu nan respectivo articulo.  

SPERANSA

Wever ta referi na e actitud fuerte di Hulanda unda cu Aruba ainda no por keda cla pa haya financiamento ya aproba (via CAFT) pa por sigui maneha e crisis di COVID19. Wever ta referi na e ‘episodio’ unda cu Hulanda mester a duna Aruba e placa pa e di tres  tranche, pero a confronta nos isla cu condicionan hopi pisa cu por tin consecuencia hopi impactante. 

GUERA DI TITAN

Segun Wever, net 10 aña despues cu e dos islanan menciona haya nan status nobo, e tres islanan aki a cuminsa un bataya titanic contra Hulanda pa garantisa e status recien adkeri di ta un pais igual den Reino y no e status di colonia. Ta bin e pregunta interesante cu academiconan destaca ya caba ta scirbiendo ariba, esta cu “Hulanda ta imponiendo cambionan di structura estatal anti democratico”. Wever ta toca tambe e parti di e asina yama ‘entidad’, “unda cu e paisnan lo no tin control, no ta aceptabel”. Esaki pasobra e condicionan cu ta wordo exigi, ta mucho halto. “E medidanan proponi no por djis wordo aplica. No tin un solucion ‘one size fits all pa resolve e situacion di e tres islanan”, Wever ta sigui bisa. E ta haya cu (Hulanda) mester mustra mas empatia pa cu e tres islanan aki. Aki tambe Wever ta referi e.o. na e situacion di crisis riba tereno di salud, cu Hulanda ta malusa pa logra otro asuntonan cu den un situacion normal lo no a ni bin na ordo pasobra no tin indicacion pa cu esaki. Y manera cu e ta cera tur su ultimo comunicadonan, den esaki tambe e ta haci mescos. “ Aruba, Corsow y Sint Maarten, keda positivo y nos lo vence 1. #This too shall pass”. Por lesa su articulo completo den e buki cu por wordo gedownload AKI.