Rutte: Hulanda ta den top tres di paisnan pio afecta pa COVID19

DEN HAAG – Hulanda ta den e top 3 di paisnan pio cu COVID19 actualmente na mundo. Segun prome minister Hulandes Mark Rutte durante conferencia di prensa diabierna mainta, Hulanda ta te hasta mas malo cu Merca. Hunto cu Spaña y Francia, Hulanda ta forma e top 3. “Nos ta mas malo cu Merca” Rutte a bisa. Esaki pasobra Hulandesnan, primordialmente e grupo di hende mas hoben, no ta cumpliendo cu e reglanan stipula manera mester ta. 

CONSECUENCIA

E consecuencia ta e.o. cu hospitalnan a stop di haci otro servicio cu no ta COVID19, cu ta nifica cu hopi hende no por haci operacion ‘regular’ y importante cu no ta relaciona cu COVID19, y cu consecuencia cu mas hende ta fayece. Y esaki ta pone cu hendenan ta teme cu mas medida por ta na caminda pa por controla e situacion aki miho. E mandatario ta lamenta cu mester bay asina pero no ta descarta mas medida cu por afecta te hasta horeca. “No ta cu nos kier stroba Horeca, pero ta eynan ta unda tin mas movimento” Rutte a sigui bisa. Pa loke ta uso di tapaboca, e unico caminda cu esaki ta obligatorio, ta den transporte publico. “Pero si mester tuma paso pa haci esaki obligatorio, mi lo no duda pa haci esaki” Rutte a sigui bisa. Ultimo dianan tin discussion fuerte riba e tema aki, pasobra ta considera cu uso di tapaboca no ta echt yuda, sin cumpli cu e otro dos reglanan cu ta laba man y distancia di 2 meter for di otro.