Dos polis reconoci pa nan trabou excepcional prome cu fin di aña

ORANJESTAD - E dos agentenan, esta Rolando Ras y Jamal Courtar recientemente a keda reconoci pa nan trabou excepcional pa Alto Comisario di Polis, mr. Adolfo “Dolfi” Richardson. Ta trata di un caso di asistencia cu nan a duna na un ciudadano den un experiencia personal hopi doloroso algo prome cu fin di aña. Nan a purba reanima mama di e ciudadano concerni, prome cu yegada di ambulance, pero no a logra sinembargo di salbe. No obstante esaki, e accion extra cu e polisnan a duna e caso, a pone cu nan hefe halto a recompensa nan pa nan acto.

E mas bunita di e experiencia aki ta cu e Polisnan envolvi a haci locual nan a haci pa e ciudadano di curason, como parti di nan sentido di responsabilidad y no cu intencion pa haya cualkier reconocimento of fama. Nan no a papia di e caso, pero asina mes nan accionnan a yega te na Korpschef den un carta.Alto Comisario Dolfi Richardson a invita e dos agentenan, esta Rolando Ras y Jamal Courtar pa un encuentro diabierna mainta. Aki, el a entrega nan un certificado di aprecio como reconocimento pa e compasion cu nan a demostra y e forma pro activo cu nan a “follow up”.

Agentenan Courtar, Ras y compañero Franken, cual nan no kier laga afo, a cera conoci cu e señora cu a skirbi e carta ora cu nan a bay na su cas pa yud’e baha su mama for di auto. El a caba di bolbe for di hospital cu su mama, kende a ricibi ayudo medico na Spoed Eisende Hulp. E mama tabata asina malo cu su yiu su so no por a logra yud’e baha for di auto.

Na nan yegada, agente Courtar a ripara cu e mama tabata mustra hopi malo y no tabata halando rosea stabiel. Polisnan a avisa e señora cu nan ta conseha pa e mama bay hospital den ambulance, unda cu e señora a hesita un poco, expresando cu e no tabata kier ambulance rabia cune pasobra e ta yama nan atrobe.

Polisnan a sigura e señora cu esaki ta trabao di ambulance, cu lo ta pa miho y cu sigur nan lo bin. A yama ambulance y tanten cu nan tabata na caminda, Polis a ripara cu e mama a bira mas malo y e agentenan Ras y Courtar a cuminsa traha cune pa reanim’e. Ambulance a yega y a sigui cu e procedura di reanimacion, pero lamentablemente e mama a fayece despues di mey ora unda cu a haci tur intento pa salba su bida.