GEORGIA – E nativo di Aruba, Alex van der Linden ta determina pa bira un ‘test pilot’ (piloto cu ta test avionan special den buelo) den forza aereo Mericano. Asina e universidad cu e ta atende, Georgia Tech a raporta recientemente riba nan portal.
Na edad di 5 aña caba Alex a diseña su propio Boeing 787 pa e feria di sciencia (science fair), unda cu e la haya ayudo di su abuelo cu ta un veterano di armada Mericano, y cu ta un graduado di e mesun scol Georgia Tech, cu titulo den architectura y ingenieria civil. Como mucha, su amor pa bula a keda inspira pa su tata Karel van der Linden cu tabata traha na e aeroliña local Air Aruba hopi aña pasa.
Despues cu el a muda pa Georgia, unda cu e la lanta, tabatin dos cos cu e tabata sa caba. E tabata kier a bira piloto, y cu e restaurant Waffle House tabata sirbi e miho cuminda cu e gusta.
E ultimo 4 aña el a pasa na Colorado Springs na e asina yama Air Force Academy (Academia di Forza Aereo Mericano). Prome cu el a muda, el a ‘google’ pa sa cuanto localidad Waffle House tabatin na Colorado Springs. A resulta cu tabatin tres. Motibo suficiente pa e haci e decision mas facil.
Awor como un graduado di e academia, cu un titulo den ingenieria aeroespacial, e teniente ta un studiante pa titulo di maestria den e mesun tema, ingenieria aerospacial na Daniel Guggenheim School cu ta specialisa riba e material.
“Mi ta sinti cu mi experiencia di forza aereo a inculca hopi habilidad gerencial di maneha tempo, y tambe di comunicacion cu lo yudami ta exitoso na (Georgia) Tech” e la bisa.
E ta pasa su tempo ekilibrando proyectonan investigativo den e laboratorio di diseño di sistema aeroespacial cu su enfoke principal riba e asina yama’ Defense Advanced Research Projects Agency ‘(DARPA), cu ta inverti den tecnologia cu ta sostene sostene seguridad nacional.
Ora cu e termina su programa di graduado, e ta cuminsa entrenamento di piloto pa forza arma Mericano bou di e auspicio di e programa specialisa cu ta cay bou di Euro NATO. Pues un Arubiano test pilot, cu sigur ta un logro grandi pa nos isla. Noticiacla ta desee tur clase di exito cu su metanan. Potret cortesia di Georgia Tech news.
ORANJESTAD/SANTO DOMINGO – Un cantidad grandi di Dominicano bibando ‘ilegamente’ na Aruba, a bolbe nan pais boluntariamente. Asina e portal El Nacional a raporta diamars. Na tur, ta trata di mas di 4.300 dominicano cu tabata residencia e.o. na Aruba, cu a bolbe nan pais bek den e ultimo 15 lunanan. E portal ta cita datonan ‘estadistica’ obteni di e aeropuerto di Las Americas. Fuera di Aruba, nan tabata ubica na e.o. Panamaá, Venezuela, Colombia, Mexico, Argentina, Chile, Honduras, Corsou, Spaña, Francia, Italia y Alemania. “Mas di 60% di e Dominicanonan aki ta muhernan”, e portal ta sigui bisa. E Dominicanonan cu a bolbe tabata haci trabou domestico, restaurant, beautysalon, y den centronan nocturno. “Nan tabata biba ilegalmente, soportando e persecucion di autoridad”. E hombernan tabata traha den agricultura, construccion, panaderia y otro tipo di negoshi”. Hopi di nan tabata biba entre 5 pa 6 aña bibando illegal, y a dicidi di bolbe boluntariamente. Pa nan por a bolbe, mester a haya sosten economico di nan famia na Republica Dominicano, y incluso e consuladonan cu ta representa e crioyonan na e paisnan aki” e portal ta sigui bisa. Un dato interesante ta bisa cu mas di 200 Dominicano a bolbe e aki caba (2024) y mayoria tabata di Panama, Venezuela y Corsou. NOTA: Noticiacla independientemente no por a verifica e informacion aki adkeri di e portal en cuestion.
CARACAS – Presidente Venezolano Nicolas Maduro a sigura dialuna cu Venezuela ta sigui su marcha economico cu of sin licensia Mericano cu ta aproba un alivio di sanccion riba e petroleo Venezolano. Dialuna gobierno Mericano a dicidi cu no ta extende e validez di e alivio cu ta vence diahuebs awor. “Nos ta sigui, cu of sin licencia, nos no t aun colonia Mericano. Nada lo para nos, señores Mericano” e presidente a bisa. Segun Maduro, presidente Mericano Biden ta sigui chantagea cu menasa cu e ta bay kita e licensia cu e la permiti na Caracas pa comercialisa sin problema, e crudo den e ultimo 6 luna.
OLIMPIA – E flambeu olimpico pa e proximo weganan na Paris den zomer, a wordo cendi. Esaki a sosode diamars mainta di forma tradicional den e ciudad bieu Olympia na Grecia, unda cu 776 prome cu Cristo, e prome weganan olimpico a tuma lugar. Durante e ultimo edicion, no tabatin publico debi na e menasa di Covid. E biaha aki esey tabata diferente.
NEW YORK – Seleccion di hurado pa e caso penal contra ex presidente Mericano Donald Trump a cuminsa dialuna mainta na New York. Esaki ta bira un caso historico siendo e prome caso penal contra un ex presidente di Merca. Trump ta den corte pa pagamento di placa na un actriz di pelicula porno, pa e keda keto. Cu esaki e kier a evita un escandalo sexual na caminda pa e eleccion presidencial di 2016 cu e la gana. Tin un total di 34 keho contra Trump, cu si wordo haya culpable, por haya 4 aña di castigo di prizon.
ORANJESTAD – Mientras cu na Aruba ta pendiente pa e sentencia di Corte di Casacion riba matrimonio di mesun sexo, y e hecho cu otro luna Parlamento ta trata e ley mes, ya tin portalnan internacional cu ta propaga cu matrimonio di mesun sexo ta legal na Aruba. Noticiacla a wordo informa pa personanan conoci cu e tema riba e noticia di e portal aki, riba e informacion aki, cu ta confuso y por crea malinformacion pa nos isla. Ademas, e notificacion ta sali di un raportahe di un portal conoci den e mundo aki di LGBTQ+, unda cu Aruba ta figura den e top 9 destinacionan den Caribe mas pro LGBTQ+. Ta den e raportahe aki, ta informa eroneamente cu matrimonio di pareha di mesun sexo ta legal. Ademas tin e biblioteca ‘cybernetico’ Wikipedia, tambe ta raporta cu desde 2022, matrimonio di mesun sexo ta legal na Aruba.
LOS ANGELES – Conocido personahe Mericano O.J. Simpson, a fayece na edad di 76 aña di cancer. Asina su famia a anuncia diahuebs. E tabata rondona pa su yiunan y nietonan. Na februari, Simpson a keda diagnostica cu cancer di prostaat, y tabata den cuido di hospice durante su tratamento di kimoterapia. E tabata hopi famoso pa su logronan como futbolista americano (rugby) durante 11 temporada. Pero e ta mas ‘conoci’ ainda pa e caso legal unda cu a culpe pa asesina su ex casa Nicole Simpson na 1994. E la keda absolve di e cargo ey, pero despues a drenta prizon toch pa otro cargonan di robo di memorabilia.