Wever: Ta Hulanda a cambia cos cu Aruba no por a acepta e acuerdo riba mesa mas

ORANJESTAD – Ta Hulanda a cambio parti di e contenido di e loke tabatin riba mesa di acuerdo cu Aruba, cu a pone cu  Aruba no por a acepta e acuerdo ey mas. E acuerdo entre Corsou y Hulanda pa logra financiamento adicional pues (3e tranche), ta similar na loke Aruba tabatin cu Hulanda un luna pasa. Problema ta cu ora cu e version ‘actualisa’ a bolbe di Hulanda, esaki tabata diferente y cu puntonan cu Aruba no por a bay di acuerdo cu ne. Asina premier Evelyn Wever Croes a clarifica pa noticiacla.com diahuebs mainta. Y cu esey, ainda no tin acuerdo cu Hulanda. E mandatario mientrastanto ta basa su mes si, riba informacion di prensa, ya cu e mes no a wak e texto di e loke cu Corsou lo a aproba. 

CAMBIONAN APROBA

E cambionan cu Corsou ta menciona, por ehempel e cambio di nomber di e entidad y limita e autoridad di e entidad compara cu Parlamento y Gobierno, ta loke cu Wever a bisa di a informa Parlamento di dje dia 13 augustus 2020. “ Nos ta wardando e textonan di Curacao pa por compara. Pero prome gobierno di Curacao lo delibera cu su Parlamento” Wever a sigui bisa e portal awe mainta. 

FORZA FINANCIAMENTO PROPIO

“Manera mi a bisa mas trempan, nos tabata na e punto aki algun siman pasa caba pero Hulanda a cambia e condicionnan dia 4 september riba nos forsando nos pa bai busca financiamento nos mes” Wever a continua bisando, refiriendo na e hecho cu a subi mercado local pa subasta bononan. 

KICO TA WARDANDO ARIBA AWOR

Pues, Aruba, Wever ta subraya, no tin ningun acuerdo cu Hulanda ainda, y ta mas bien wardando riba e aprobacion di Hulanda pa loke ta e suma te cu december, a base di e advies di Caft. “Y nos ta wardando e cambionan den e texto. E concept di Aruba no a cambia mas desde 13 augustus (2020).  “Ora e cambio di 4 september (2020) a bin, a haci tur lo demas superfluo pasobra nan a forsa nos mes sigi busca financiamento” Wever a sigui bisa. “Aruba cu Hulanda a yega e punto di negosacion un luna pasa loke Cur a yega awor. “Esey so”. “Nos ta sigui na mesa cu Hulanda”  Wever a finalisa bisando.