Maduro: Tur loke cu Corsou logra y cu ta conta pa Aruba tambe, ta positivo pa nos pais

ORANJESTAD – Negosacion cu Hulanda ta tuma su debido tempo. Asina minister di Finanza Xiomara Maduro a bisa noticiacla.com como prome reaccion diaranson. Esaki despues di a tuma nota di e informacion cu Corsou lo a keda cla pa firma cu Hulanda. “Nos punto di salida den e negociacion cu Hulanda ta bienestar di Aruba y esaki ta tuma su debido tempo” Maduro a bisa, mas concretamente.

AVANSE POSITIVO

Segun Maduro, tur avance positivo cu Corsow por a logra den nan negociacion cu Hulanda y cu ta conta pa Aruba tambe, ta noticia positivo pa nos Pais.  “Nos ta pendiente pa haya e texto pa nos por haya e detaye di e avance. Na fin di dia ta un Ley di Reino tin riba mesa” Maduro a bisa den su reaccion cortico. 

REACCION PREMIER

Mientrastanto algo prome, premier Wever Croes a reacciona pa e portal aki tambe riba e tema. “Aruba y Hulanda a yega na un acuerdo mas di un luna pasa caba”. Wever Croes a bisa noticiacla.com diaranson merdia, reaccionando riba e noticia cu Corsou ta practicamente cla pa firma cu Hulanda. “Tur cos a cambia ora dia 4 sept (2020:red) Hulanda a cambia e condicionnan sin overleg cu nos prome y a forsa nos cana un otro caminda” Wever a bisa. Esey ta e dia segun e prome minister, cu Hulanda unilateralmente a dicidi cu Aruba no ta haya e fondo pa juli y augustus mas, e mandatario a bisa.

CORSOU 

E dia a cuminsa cu e informacion unda cu tur cos tabata mustra cu Gobierno di Corsou tabata cla pa firma nan acuerdo cu Hulanda pa loke ta e entidad y tambe e asina yama landspakket. Den un carta di prome minister Eugene Rhuggenaath na Presidente di Parlamento Pauletta,e la splica di e posicion di Gobierno y e loke a yega na otro. Un di e puntonan principal ta cu no ta mishi cu e autoridad di gobierno ni di Parlamento, pues cu e organo mas halto ta ‘keda’ cu su autoridad, no obstante cu tin un entidad cu ta haya bida proximamente. E cambionan logra segun premier Rhuggenaath, ta suficiente cu Corsou por ‘biba cu ne’.