Rhuggenaath: Corsou ta cla pa firma acuerdo cu Hulanda

WILLEMSTAD – Tur cos ta mustra cu Gobierno di Corsou ta cla pa firma nan acuerdo cu Hulanda pa loke ta e entidad y tambe e asina yama landspakket. Den un carta di prome minister Eugene Rhuggenaath na Presidente di Parlamento Pauletta,e ta splica di e posicion di Gobierno y e loke a yega na otro. Un di e puntonan principal ta cu no ta mishi cu e autoridad di gobierno ni di Parlamento, pues cu e organo mas halto ta ‘keda’ cu su autoridad, no obstante cu tin un entidad cu ta haya bida proximamente. E cambionan logra segun premier Rhuggenaath, ta suficiente cu Corsou por ‘biba cu ne’.

KICO TA KICO

E mandatario ta papia den e carta di e adaptacion di e ley di Reino pa loke ta e entidad, cu envez di CHE, (Caribisch Hervormings Entiteit), awor mas sigur lo yama Orgaan voor Hervorming en Ontwikkeling (OHO). E cambionan ta amplio, y ta salvaguardia e tarea di tanto Gobierno como Staten, segun e prome mandatario. Entre otro a sigura cu cada cambio di reforma, mester haya aprobacion di Staten (Parlamento). Tur inversion cu bin, si e tin influencia riba presupuesto, mester wordo acorda pa Staten. Pa loke ta e entidad, esaki no por eherce autoridad cu basa riba ley di Corsou, ta resorta na un organo di gobierno. Tambe e nombramento di por lo menos un miembro di e entidad lo ta den consulta cu prome minister di Corsou y tambe riba e demas constelacion y forma di traha, lo ta den consulta cu Corsou, y a base di acuerdonan anteriormente aproba. E entidad ta stop di existi despues di 6 aña, y despues di tres aña lo bay den un evaluacion. E intencion, segun e portal aki a compronde, ta pa pa firma e acuerdo pa 10 di October proximo. No ta conoci si esaki ta un tipo di simbolismo, compara cu e fecha riba cual Corsou a bira un pais autonomo (Status Aparte) esta dia 10 di october 2010. Por lesa e carta completo AKI. Potret cortesia Extra Curacao.