E ley nobo di screening di minister lo a ancra concepto di ‘friends and family’ legalmente

ORANJESTAD – E ley regardando screening di minister cu no a logra pasa ayera, tin puntonan cardinal di desvio compara cu e ley vigente (Landsbesluit) di 9 di september 2013, a base di cua screening di ministernan ta regla actualmente. Asina expertonan legal riba e tereno a informa e portal aki diamars, y cu ta puntonan cu ta mas bien ‘ancra’ e pensamento di ‘friends and family’ pa medio di e cambio di e ley aki. Cu e condicion cu nan ta keda anonimo, a bay di acuerdo pa duna nan interpretacion legal di e ley aki. Mester tene cuenta cu esnan cu a analisa esaki, no ta politico, ni asocia cu un of otro partido politico. En todo caso por constata un desviacion cardinal, den e parti di miembronan di famia. 

MIEMBRONAN DI FAMIA

Den articulo 1 di e ley tin e descripcion di kico ta “gezinsleden” osea miembronan di famia cual ta: esposo(a) of partner, como tambe yiunan y nan casa of partner, yiunan adoptivo of di criansa, y e mayornan di e candidato of minister. E hecho di ken ta wordo considera como famia segun e ley, ta importante ora di divulga informacion di e interesnan di negoshi y e funcion y trabou adicional (nevenfunctie). Esakinan ta asuntonan cu ‘normalmente’ un candidato of minister mester distancia su mes di nan. Segun e ley (Landsbesluit) actual, mester divulga informacion di funcion adicional di e candidato y su famia te den tercer grado. Pero, e cambio aki den e ley nobo lo tin como posibel consecuencia negativo cu interesnan di negoshi of funcionnan adicional di un gran parti di e famia cercano di e candidato no mester wordo divulga mas. Door di e descripcion di e miembronan di famia (gezinsleden) den e ley nobo ta exclui awor informacion di:

    - famia prome grado (eerste graad): suegro (suegra);

    - famia di dos grado (tweede graad): rumannan, abuelo(a), nieto(a), swa, cuña;

    - famia di tres grado (derde graad):  omo, tanta, primo(a), bisabuelo(a), bisanieto(a).

CON E TA FUNCIONA DEN PRACTICA

Den practica, e expertonan di ley ta mustra cu esaki por pone cu si un candidato of minister pone su interesnan di negoshi cerca un ruman of suegro(a), e no tin obligacion di divulga e informacion tocante di esaki. Segun e expertonan aki, e pregunta ta di ‘con no a scohe pa inclui famia te den segundo grado’. Cu e cambio aki, e ta pues ancra e concepto popular di ‘friends and family’, den e ley nobo aki, cu sinembargo no a pasa. Algo cu hopi politico a y ta acusa otro di dje, y cu por tin su consecuencia negativo si esaki keda asina, segun e expertonan aki.