OCCA a pone presion pa mas voz na Colegio Arubano

ORANJESTAD – Cu e intencion di pone mas presion riba nan meta pa haya participacion den directiva di Colegio Arubano, e presidente di Ouder Comissie Colegio Arubano (OCCA) Tamara Croes a splica cu nan ta determina pa logra nan meta. E meta pa tin un miho representacion pa asina por salvaguardia e interes di nan yiunan na e scol aki. Punto principal di OCCA ta cu e scol no tin e mucha central aworaki y ta actuando robez cu por perhudica e estudio y porvenir di e mucha. 

HISTORIA

Segun Croes, pa mas di 15 aña (Desde 2005) OCCA tabata forma parti di e directiva di Scol (SPOA) y tabata e voz di e alumnonan via mayor. Pero awor na 2020, esaki a caba unda cu den e directiva di scol, tin apenas un representante di OCCA cu ta traduci na solamente un miembro di e directiva cu tin yiu na e scol. Pa OCCA no ta suficiente pa ta un organisacion cu ta para pafo y bringa pa nan yiu. Nan kier participacion den directiva, nan kier medezeggeschap, pero ley no ta permiti esaki aworaki. 

EXPERIENCIALoke cu Croes ta lamenta segun OCCA, ta cu e directiva actual no tin e experiencia necesario pa maneha e scol, y ta carece di experticio di maneho di enseñansa, finanza y e experticio tecnico. Como tal e directiva actual no ta apto pa haci nan trabou y no tin e conocemento necesario. 

CARTA HABRI

E portal aki a publica recientemente un carta habri di un persona liga na e scol, cu a basicamente ‘basha abou’ riba e situacion cu tin na e scol, unda cu pa cuminsa, tin conflict di interes ya cu e presidente di e directiva, ta traha directamente pa e minister actual di enseñansa. Lo kier saca fondo di e scol pa asina subsidia otro scolnan, y asina tin mas cos cu e carta habri a trece na claridad. E carta aki a haya atencion tambe di OCCA pero e directiva di scol a basicamente hala e carta y su contenido un banda, no dunando e e importancia. “Ainda nos no sa con pa reacciona riba esey” Croes a admiti pa e portal aki durante e conferencia di prensa dialuna mainta. OCCA actualmente ta den un campaña di colecta firma pa logra duna OCCA nan derecho bek pa ta den e directiva manera mester ta.