Lo multa Mota Engil pa e problemanan riba WVB debi na awacero

ORANJESTAD – E compania responsabel pa construccion di Watty Vos Boulevard, Mota Engil lo haya un carta e siman  entrante unda cu lo multa nan pa varios punto di incumplimento. Asina director di Dienst Openbare Werken (DOW) Marlon Croes a bisa den un conferencia di prensa na e sitio diasabra atardi tempran. E awacero torencial di diasabra mainta a causa varios problema riba e avenida nobo, cu a pone cu mester a cera esaki pa reparacion. Consecuentemente esey tin consecuencia pa e compania responsabel.

E SITUACION

Debi na e awacero torencial, parti di e santo mei mei di e avenida, cu ta separa e dos vianan, a los y plama riba varios parti di e avenida, cu a pone cu esaki no tabata ‘safe’ mas pa e trafico. Santo, piedra y cantidad di awa a pone cu e caminda mester a wordo cera pa asina haci esaki limpi atrobe pa trafico. Varios parti consecuentemente no tabata usable y a crea un problema grandi di trafico. 

CONSECUENCIA

DOW a tuma nota den curso di dia di e situacion, a haci tur anotacion necesario y a formula nan preocupacion y carta cu tin cu bay pa e compania responsabel, cu consecuencia cu esaki tin cu bay paga pa varios multa, pa varios di e infraccionan. Entre e infraccion, tin esun cu ‘mester a cera e caminda’ na varios parti. Esey riba su mes ta un infraccion (boet punt), sigui pa a haci e situacion di trafico insigur, cu tambe ta considera como un infraccion. E loke a bin riba e caminda, pues e condicion di e caminda, e awa, santo y piedra, tambe ta un infraccion y asina por a sigui. Segun contracto, asina cu e puntonan aki keda obstaculisa, e compania constructor tin cu carga cu e gastonan aki. Como tal den e contracto, tabata poni specificamente cu gobierno ni DOW no ta mete den e maneho y construccion, pa cual e compania constructor ta carta tur responsabilidad. Y esaki pa un periodo di 20 aña. Si e compania no cumpli, gobierno no ta paga, y consecuentemente e ta bira un problema financiero pa e compania constructora. Esey y mucho mas ta e reglanan den un proyecto PPP, (Public Private Partnership). E compania ta asumi tur responsabilidad pa 20 aña incluyendo mantenimiento y a cambio cada tres luna gobierno ta paga e loke e proyecto a costa. Fuera di Watty Vos Boulevard tin un otro proyecto PPP cu ta Green Corridor construi pa e compania Odinsa. Aki tambe tabatin varios problema na comienso cu a keda soluciona durante e periodo di e learning curve.  Aworaki e compania otro, Mota Engil, ta pasando den esaki y tin cu wak con e ta remedia tur e problemanan aki pa asina e avenida keda trafficable y cu e no ta costa nan mas placa. No ta conoci cuanto multa gobierno lo cobra e compania. Den pasado recien, e compania a haya multa caba, pero a dicidi cu e ta bay bringa e multanan y tabata den e proceso aki te cu recientemente. No ta conoci pa e portal aki si mientrastanto e compania a dicidi di paga of si ainda e ta bringando esaki cu gobierno. Potret di conferencia di prensa di DOW na WVB ta cortesia di 24ora.com. E resto di potretnan ta di noticiacla.com mes.