No ta cobrando impuesto nobo 'BAZV' corecto

ORANJESTAD – Cobramento di e impuesto ‘nobo’ BAZV (y BBO tambe) door di comerciantenan no ta bayendo bon. Mientras cu no tin cifra pa bisa exactamente con grandi e problema ta, departamento di impuesto (SIAD) tin informacion cu un grupo grandi di comerciantenan sea no ta compronde e situacion (hopi di nan) of no kier compronde. SIAD a confirma na NoticiaCla.com cu ‘tin un confusion con ta cobr’e’, y of ‘con ta pone riba recibo’. Como tal segun vocero di SIAD Meverly Romano, nan ta preparando pa bay un tiki mas den publicidad riba e parti ey pa duna un clarificacion na e clientenan comerciante.

Segun Romano, no mester lubida cu ta e comerciante ta esun cu ta e suheto cu tin cu paga e impuesto aki. No e cliente. “Nos no ta wak e consumidor of cliente di e comerciante. Nos ta wak e comerciante”. E comerciante ta haye aworaki cu un otro impuesto cu e tin cu paga, banda di BBO. E comerciante tin cu evalua si e ta adapta su prijs of ta lague mescos of ta carga e carga e gasto di e impuesto, segun SIAD. E ta un decision completo di e comerciante. “Den esey, departamento di impuesto no tin nada di bisa.” Nan ta wak solamente kico e la ricibi den man, for di su cliente. “Kico e la cobra. Si un producto a costa 100 florin, pero e la pone riba e recibo, 1 florin y 1.50 di bbo y bazv, e la cobra e cliente 102.50, nos ta bay wak 102.50. Nos no ta bay wak e 100 florin. E sistema ey, si e pone asina riba e recibo, e ta bay haci cu e comerciante ta haya un ‘omzet correctie’ si bin un investigacion. Esaki pasobra e ta menciona un suma di BBO cu no ta corecto”.

Segun Romano, e ta fout, pasobra e comerciante ta coy e 1% riba 100 florin pero SIAD ta cohe riba 102.50. Kier men riba e total cu e la ricibi. “Riba esey, nos ta bay duna un clarificacion mas detaya pasobra esey ta e confusion cu tin awor” Romano a bisa. Pues e calculacion di e comerciante ta haci pa su administracion, no necesariamente mester ta e manera cu e ta aparece riba su recibo. “E manera ideal cu e por hacie y pa evita haya omzetcorectie, ta pa e comerciante menciona un solo prijs riba su recibo. “Kier men si un producto ta 100 y e la hacie 102 florin, e ta menciona un solo suma y no ta bay conta nada extra” Romano ta finalisa bisando.  

Loke cu ley ta pidi, ta pa e comerciante menciona e BAZV riba e recibo. “E no ta bisa e comerciante pa e cont’e riba e 100 florin cu e la cobra”. E motibo su tras ta cu kier a crea mas transparencia pa e cliente. E cliente mester por wak cuanto a bay pa BAZV.