Menos caso positivo di COVID19 na Aruba pero un morto mas

ORANJESTAD – E cifranan official di DVG di e situacion di COVID19 di awe  diaranson ta mustra ‘alentador’. Cifra di caso positivo a baha bastante, pa ta mei mei di siman na ‘apenas’ 29 positivo. Segun e resumen , 78 persona mas a recupera, e positivity rate ta 13 %. E total di casonan activo a baha cu 50 persona y awor ta na 677 awe, total di testnan haci ta 294, testnan haci bou di residentenan na laboratorio di hospital ta 216. Lamentablemente tin un morto mas cu ta haci e total aki 27.   

ALGO NO TA CUADRA

Analisando e cifranan, ta nota pues cu tin menos hende raporta cu ta COVID19 positivo diaranson, pero mas hende a muri.  Fuentenan medico cu cual e portal aki a papia, ta mustra cu e plachi tin cosnan cu no ta cuadra. E ocupacion den hospital pa COVID19  p.e. no ta baha. Y e yamada awe di DVG pa mas hende bay test, no ta trankilisa e situacion niun tiki. 

NUMBERNAN NO TA CUADRA

Segun e mesun fuentenan aki, e numbernan supuestamente positivo, no ta refleha un realidad di e situacion COVID19. Segun e relato di DVG mes di diaranson mainta, tin mas hende eyfornan cu ta canando rond cu e virus, pero cu lo no kier test pa cualkier motibo. Y e yamada urgente di DVG pa tur hende bay test, ta duna un indiacion cu e situacion ta mas serio cu nos ta kere. 

HOSPITAL

Hospital ta informa cu tin un total di 43 persona interna di cual 10 ta den cuido intensivo y 33 ta isola riba piso general.