Deficit democratico riba islanan Caribe Hulandes mes y no entre nan y Hulanda

ORANJESTAD – E deficit democratico cu e islanan di Caribe den Reino ta critica, ta riba e islanan mes, y no entre e islanan y Hulanda. Ora cu papia di deficit democratico, e islanan (Aruba, St Maarten y Corsou) ta reclama cu nan no tin e mesun legitimidad compara cu esun di Conseho di minister di Reino. Segun parlamentario hulandes Andre Bosman (VVD), su precupacion ta cu e deficit ta den e propio Staten di e islanan menciona.

Bosman ta basa su mes riba esaki pasobra segun e parlamentario, e problema ta cu miembronan di Staten no ta haya tur e oportunidad pa haci pregunta. Of si ta haya e chens pa haci pregunta, no ta haya e contestanan, of chens pa un debate of pidi un minister pa responsabilisa su mes riba un tereno. “No por ta asina cu un miembro di Staten, irrespecto si ta un coalicion of oposicion, cu bo no ta haya contesta riba bo preguntanan. Esey pami ta deficit democratico” Bosman ta sigui bisa.