DVG: Caida drastico den cantidad di persona pa test pa COVID19

ORANJESTAD - Departamento di Salud Publico (DVG) a tuma nota cu e cantidad di personanan cu ta yega laboratorio di hospital pa haci test a baha drasticamente. Asina e vocero Jurrete Maduro ta informa diaranson mainta. Manera cu e portal aki a raporta anteriormente,  for di siman pasa a nota un cambio den cantidad di testnan cu ta wordo haci pa e virus. A compronde di fuentenan di Hospital e momento ey cu tabata pasobra tabatin scarsedad di test, cu mientrastanto a keda soluciona. Awor, segun DVG, ta resulta cu ta falta di interes tin pa hende haci test y cu ta pesey e cantidad di casonan 'positivo' a baha. Mester bisa tambe cu hospital a emiti un video ayera cu un mensahe di e situacion na Eerste Hulp, unda cu ta 'confesa' cu hendenan cu ta bin Eerste Hulp, no ta bisa cu nan tin COVID19, of cu nan tin e simptoma, te ora cu nan a pasa varios punto di control. Esaki ta crea un problema tambe pa esnan cu a bin den contacto cu nan e momento ey. 

PREOCUPACION

Segun DVG, e situacion cu a surgi sigur ta un punto di preocupacion mirando cu cifras di positivo compara cu e cantidad di test (positive rate) no ta bahando cu mesun rapides. DVG tambe ta confirma cu na hospital tambe ta yegando hende hopi malo cu mester wordo interna cu no a pidi asistencia di dokter di cas den un fase mas trempan. E situacion aki sigur ta uno di lamenta y ta uno di preocupacion mirando cu tin persona cu tin sintoma ta opta pa sigui move rond y plama e virus sin pidi pa haci test. Sea pa motibonan financiero of pa motibo e sintomanan ta leve.

SIMPTOMA

Departamento di Salud Publico kier a recorda comunidad cu na indicacion di sintoma di covid cu por ta paresido na griep, mesora tuma contacto cu bo dokter di cas pa bin na remarke pa por test. No cana rond cu sintoma y pega otro persona. Tampoco warda te ora bo ta hopi malo y no por mas pa yega hospital. Tuma responsabilidad trempan y haci un test pa bo propio salud y di otronan. Mas lihe bosa cu bo ta positivo mas miho bo por cuida bo mes, cuida otro y colabora den reduci e cantidad di contagio.