Aruba tin otro morto pa COVID19 y casonan positivo a subi

ORANJESTAD – Aruba a registra su di 26 morto pa COVID19, y a conoce otro aumento di caso positivo diamars cu 62 caso nobo. Un dia prome esaki ainda tabata apenas 28 caso. Pero a bira un custumber cu den weekend hende no ta test casi, y te hasta nos tin e informacion (ainda) cu esaki tabata debi na scarsedad di test. E cargamento nobo di test a yega diadomingo, y dialuna a test mas hende caba. Y e resultado ta conoci. E positivity rate ta 34%, compara cu 39% un dia prome. Tene na cuenta cu e cantidad di test haci tabata hopi mas chikito si diadomingo (apenas 72). 

MAS INFORMACION

 Segun resumen di awe  por tuma nota cu 144 persona mas a recupera, total di activonan a baha cu 83 persona y ta na 727 awe, total di testnan haci ta 388, testnan haci bou di residentenan na laboratorio di hospital ta 184.

HOSPITAL

Hospital ta informa cu tin un total di 47 persona interna di cual 11 ta den cuido intensivo y 36 ta isola riba piso general.