Banco Central di Aruba ta refuta cu florin di Aruba ta na peliger

Posted on 09/29/2020 10:22 am AST | Updated on 09/29/2020 10:23 am AST

ORANJESTAD – E florin di Aruba no ta na peliger. Den un comunicado di prensa, Banco Central di Aruba (BCA) a reacciona riba ponencianan cu segun e instituto financiero, ta infunda y eroneo di sr. Arjen Alberts manera publica den un matutino recientemente.

FIA RIBA MERCADO

Segun e comunicado, desde Status Aparte, cu crisis of sin crisis economico-financiero, gobiernonan di Aruba, sin excepcion, a fia riba mercado local sin cu esaki tabatin impacto riba e tasa fiho di nos florin pa cu dollar Mericano, esta Afl. 1.79. E motibo principal cu gobiernonan mester a fia ta cu un par di biaha so gobierno di Aruba tabatin un surplus riba su posicion financiero den e casi 35 aña cu a transcuri.

FLORIN A MANTENE BALOR FIHO

A pesar di esey y cu of sin crisis, e comunicado ta sigui bisa, nos florin desde 1986 a mantene su balor fiho contra e dollar menciona anteriormente, cual ta hancra den ley, manera ta publica diariamente riba website di Banco di Central di Aruba (BCA). Independiente di e maneho fiscal di gobierno di Aruba, sea restrictivo of expansivo, a base di circumstancianan economico-financiero, BCA como instituto autonomo semper a hiba y lo sigui hiba un maneho monetario prudente solamente cu un meta, esta mantene e tasa fiho di florin contra e dollar Mericano, cual ta e fundeshi di confianza den nos florin. Esey ta un di su tareanan principal manera stipula den ley, cu ta disponibel riba BCA su website.

MANEHO MONETARIO PRUDENTE

Pa stipula y implementa un maneho monetario prudente y asina mantene confianza den nos florin, BCA ta sigura den e comunicado, cu e tin suficiente instrumento legal, cu e ta aplica efectivamente, entre nan medidanan di divisa, cu cual a crea y a mantene semper un nivel di divisa cu ta suficiente pa cubri diferente luna di importacion y otro tipo di servicionan crucial pa nos pais, riba cual por cai bek den un situacion di crisis unda entrada di divisa por ta (severamente) limita. E reserva di divisa ta Aruba su buffer internacional principal. E ponencia di sr. Alberts cu “Nos no tin un economia propio. Tur cos cu drenta ta sali na divisa”. Y “Nunca e reservanan tabata suficiente” ta infunda, ta completamente eroneo y ta carece conocimiento basico di nos economia.

COVID19

Desde maart di e aña aki debi na e situacion di crisis relaciona cu Covid-19, BCA ta bisa di a tuma varios medida pa mantene y garantisa cu nos divisa ta na un nivel sostenibel di acuerdo cu benchmarknan internacional. Como parti di transparencia di su maneho monetario, ta publica tur decision di BCA riba e tereno aki (https://www.cbaruba.org/cba/readBlob.do?id=6310). E recien medidanan di divisa ta disponibel riba website di BCA pa cualkier analisis y tambe con nos nivel di divisa ta desaroyando su mes, incluso inflacion cu sigur ta un indicador importante, particularmente den e contexto di e posicion competitivo di Aruba contra otro paisnan regional.

IMF

Tambe por menciona cu den transcurso di añanan, e maneho monetario di BCA a wordo evalua door di Fondo Monetario Internacional (FMI) consistentemente, a base di e asina yama “Article IV missions”. A base di evaluacionan aki, FMI tambe a confirma e maneho prudente monetario den su rapportnan cu ta disponibel riba nos website.

KITA DUDA

Pa kita tur duda, BCA ta informa adicionalmente cu e reservanan oficial di divisa a nota un subida di Afl. 422,7 miyon te cu 28 di augustus 2020, compara cu fin di december 2019. Alabes e reservanan internacional (incluyendo e diferencia di reevaluacion di oro y bononan internacional) a aumenta cu Afl. 358,2 miyon, entre otro pa motibo cu actividad economico, y consecuentemente consumo domestico y importacion, a cai significantemente door di fiansanan internacional di gobierno di Aruba, incluso obteni for di gobierno di Hulanda, y e medidanan restringente di BCA riba tereno di divisa. Consecuentemente, e reservanan oficial y e reservanan internacional a yega te na, respectivamente, Afl. 2.187,5 miyon y Afl. 2.257,8 miyon riba 28 di augustus 2020, cual ta pieknan mas halto cu a wordo registra. Di e manera aki e nivel di reservanan ta cubri mas cu 10 luna di importacion. Ademas, e reservanan ta cubri 104,4% di e nivel optimal basa riba e metrico recien aplica door di FMI, esta e asina yama ‘Assessment Reserve Adecuacy’ (ARA).

ENTREVISTA MATUTINO

Consecuentemente, Banco Central ta sigui bisa, e entrevista cu sr. Alberts den un matutino den cual, fuera di otro ponencianan incorecto, e ta declara cu “dentro di algun siman, ni luna, florin lo perde su balor contra e dollar” ta infunda, ta sin base apropia monetario y financiero y no ta tene cuenta cu datonan publica. “Tambe su declaracion “ta mescos cu si gobierno ta saca placa di Banco Central y ta laga print” ta completamente eroneo, y por informa aki cu contrario na hopi pais, BCA desde su establecimento na 1986, nunca a fia gobierno di Aruba un cen y por confirma esey tambe den su cuentanan anual cu ta publica riba su website. Semper gobiernonan mester a busca un solucion riba mercado pa nan fiansanan, pa asina proteha nos florin”.

CBS

Di mesun forma, e informacion cu sr. Alberts a duna tocante inflacion ta incorecto, e comunicado ta sigui bisa pasobra publicacionnan mensual di Bureau Central di Estadistica ta mustra claramente un bahada gradual den e tasa di inflacion den 2020. E inflacion, midi a base di e cambio den e indice di CPI, tabata 0,0 porciento den juli 2020, compara cu e mesun luna di e aña anterior. E promedio di inflacion di 12-luna a baha te na 3,3 porciento na juli 2020, compara cu e nivel di 4,6 porciento cu el a yega na februari y maart 2020. E promedio di inflacion di 12-luna ora exclui e componentenan di energia y cuminda ta 2,9 porciento na juli 2020. E expectativa ta cu e tasa di inflacion lo sigui baha den e resto di aña aki, debi entre otro na un reduccion den tarifa di coriente desde 1 di januari 2020, e ausencia di e efecto di e introduccion di BAVP, y tambe, asumiendo un prijs mas abou y stabil di crudo ademas di ningun aumento den impuesto.

LAMENTO

BCA ta lamenta cu sr. Alberts, den su entrevista cu e matutino, ta malinforma e publico usando declaracionnan infunda y incorecto cu ta carece conocimento basico monetario-economico aplicabel pa nos isla y innecesariamente ta crea asina desconfiansa den nos florin sin ningun base corecto.

SETAR a tene su Avigilon ALTA Launch Event cu enfoke riba e futuro di seguridad
(ADVERTORIAL)
Mas Economia
Lesa Mas
CBS: Bestaansminimum a subi atrobe na Aruba debi na aumento di gasto di cuminda
ORANJESTAD - E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0- 15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).
Mas Economia
Lesa Mas
WEB Aruba ta firma acuerdo cu Seven Seas Water Group pa construi planta SWRO-3
ORANJESTAD – Diaranson dia 17 di mei ultimo, WEB Aruba y Seven Seas Water Group (SSWG), un proveedor multinacional di ‘Water-as-a-Service® (WaaS®) solutions’, a firma un acuerdo Build-Own-Operate-Transfer (BOOT) cu un termino di traspaso di 10 aña. Seven Seas Water (Aruba) VBA lo construi un planta di SeaWater Reverse Osmosis (“SWRO”) cual lo contribui cu un minimo di 16.500 meter cubico di awa potabel pa dia. E asina yama SWRO-3 lo ta parti di WEB Aruba su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. SSWG a haya e contrato despues di un proceso di tendering y negociacion na 2023. Lo construi e planta SWRO-3 riba tereno existente di WEB y ta planea pa cuminsa opera pa medio 2026.
Mas Economia
Lesa Mas
Banco Central ta mantene e tasa di reserva obligatorio na 22,0 porciento
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
Mas Economia
Lesa Mas
Schlipken: Aruba ta spera 18 mil turista Brasilero den 2024
SAO PAOLO – Aruba ta spera 18 mil turista Brasilero den 2024. Asina e director di turismo di ATA pa Latino Americano, Jordan Schlipken Croes a declara e siman aki na e portal PANROTAS, durante e evento WTM Latin America na Sao Paolo. Segun Croes, Brazil ta e di tres mercado Latino mas grandi pa Aruba, despues di Colombia y Argentina. Ta mustra cu na 2023 tabatin 14 mil bishitante di Brazil pa Aruba. Segun Croes, un di e motibonan di e cifranan grandi aki, ta e gastonan di e Brasileronan den e pais. Pa por yega e cifra di 18 mil Brasilero, Aruba tin 4 strategia principal pa e pais, fuera di e participacion na e bolsa di turismo Brasilero. Esaki ta e.o. incentivonan cu e operadornan y agente di biahe, ya cu 70% di Brasilero cu ta biaha pa Aruba ta cumpra nan pasashi via agentenan di biahe.
Mas Economia
Lesa Mas
Aeroliña Mericano a reduci prijs di pasashi pa Aruba cu 50% e siman aki!
BOSTON – E aeroliña Mericano conoci pa tarifa reduci, JetBlue a reduci su tarifa mas ainda, cu 50% pa biahero pa e.o. Aruba. Nan ta yame un deal special di 2 dia ‘Hit Refresh’, unda cu dentro di e dos dianan aki, e biaheronan mester cumpra e pasashi. Por usa e biahe entre 7 di mei pa 12 di juni y no tin asina yama ‘blackout dates’ osea dianan cu bo no por biaha. Pa Aruba e prijs a wordo reduci cu 50% di p.e $776 dollar te na $378 round trip. No ta algo inusual y ta algo cu nan ta haci frecuente, pero ta sigui interesante. Tur e pasashinan tin cu origina for di Boston.
Mas Economia
Lesa Mas