Bosman: Indicacion cu Aruba lo no cumpli cu tur palabracion haci riba presupuesto 2015

ORANJESTAD – Tin indicacion cu no tur palabracion haci entre Hulanda y Aruba riba e presupuesto 2015 lo ‘aparece’ riba e presupuesto 2015. Y como tal cosnan rond di e presupuesto 2015 no ta bayendo facil. Esaki ta loke tin parlamentario hulandes Andre Bosman (VVD) precupa. “Pero mi ta compronde esaki si. No ta facil. Sigur no” e parlamentario a sigura NoticiaCla.com durante su bishita na Aruba recientemente. “Mi ta hopi interesa den e presupuesto 2015”. E parlamentario no kier a laga los, unda exactamente e la haya su informacion, pero ta sigura cu no ta di minister di finansa di Aruba Angel Bermudez. “Mi no por desmenti ni admiti pasobra esey ta combersacionnan priva” Bosman a bisa di su combersacion cu e mandatario arubano.

Riba e mandatario nobo, esta Angel Bermudez (e la topa siman pasa durante un encuentro) e no tabatin mucho comentario, sino solamente cu e ta dune e espacio pa traha. “E la caba cuminsa. E tin hopi conocemento. Sigur hopi conocemento di finanzas” Bosman a sigura NoticiaCla.com. Pues e tin confiansa, y kier mira e situacion cu un bista positivo, aunke toch precupa’. “Si (Aruba) no tuma paso positivo, cu a wordo traha pa cu e presupuesto, y no duna contenido na e mehoracion di e maneho financiero, e ora mi ta ‘cai aden atrobe’” Bosman a sigura NoticiaCla.com.