Sarah Wescott: Cu of sin CFT, St Maarten lo a sali for di su situacion financiero

ORANJESTAD – Cu of sin College Financieel Toezicht, St Maarten lo a sali for di e problema financiero cu e lo tabata aden. “ CFT no a wordo poni pa mehora e situacion financiero di St Maarten” premier di St Maarten, Sarah Wescott Williams a bisa NoticiaCla diaranson atardi. Tur loke cu CFT tabata poni pa haci, ta raporta si condicionnan stipula pa mehora e plachi financiero, no wordo cumpli cune. “Claro cu St Maarten a conoce progreso” e mandatario a bisa, pero no ta solamente pa motibo di CFT. “Pero pasobra e isla di St Maarten ta realisa con importante ta pa mantene su finanzas na ordo. Tin caminda pa mehoracion den paisnan chikito manera nos isla” Wescott Williams a bisa. E la mustra tambe cu por scohe un maneho pa drecha bo situacion financiero a costo di bo isla, of bo por uza e modelo cu Aruba a uza, esta di cuminsa mara faha, pero tambe duna bek pa e economia di e isla por cana.

E pregunta a bin, pa establece si berdad cu CFT ta un ayudo of un estorbo. Comentarionan a bin ora cu for di Corsou a bin informacion cu ni cu CFT, e situacion financiero di e isla no a mehora, pues de hecho CFT no ta un ayudo manera cu Hulanda kier pretende cu e ta. Wescott Williams ta sigura NoticiaCla cu, cu of sin CFT, e isla su situacion lo mester a mehora. “Cualkier gobierno responsabel mester haya solucion pa su situacion financiero. E por ta CFT of un otro” e mandatario a finalisa bisando.

E mandatario ta na Aruba riba un bishita corto, pa mustra sosten na premier Eman, y a haci esaki ademas di manda un carta pa Hulanda den cual ta mustra e sosten pa Aruba y su solidaridad. E ta mustra cu si no logra pa medio di e carta aki, nan lo urgi islanan den region pa tambe vocifera nan opinion contra e loke cu Hulanda ta haciendo contra Aruba.