Oduber: Medida nobo di New York ta sla pa economia di Aruba

ORANJESTAD – E decision pa manda tur biahero for di Aruba (cu bolbe New York) den cuarentena pa 2 siman, ta un sla pa nos economia. “ Nos a tuma nota di e noticia aki y sigur e no ta un noticia bon pa Aruba” minister di turismo, Dangui Oduber a bisa noticiacla.com diamars mainta como prome reaccion. Ta trata di e noticia unda cu tur ciudadano di New York cu bishita p.e. Aruba, mester bay den cuarentena obligatorio ora cu nan regresa nan pais. Esaki pa menasa di COVID19, unda cu awor ta considera Aruba tambe como un menasa. Unico paisnan den Reino Hulandes cu no ta un menasa, ta Bonaire, Saba y Statia. 

MERCADO PRINCIPAL

Nos mercado principal ta New York y cu e decision aki, cu e gobernador di New York a tuma pa tur esnan cu regresa for di entre otro Aruba mester bai den cuarantena obligatorio ta pone cu e viahero especialmente for di New York lo ta mas cauteloso pa viaha pa Aruba” Oduber a cuminsa na bisa. “ Obviamente esaki lo por tin consequencia pa nos turismo cu ya caba ta pasando den su peor momentonan den nos historia como pais. Netamente pesey ta asina importante pa nos por reduci e cantidad di contagio y casonan positivo mas liher posibel” e mandatario a finalisa bisando.