AHATA: Medida nobo pa turistanan cu bolbe New York for di Aruba ta devastador

ORANJESTAD – E CEO e asosacion turistico hotelero (AHATA) Tisa LaSorte ta considera e noticia di cuarentena pa pasaheronan di New York for di e.o Aruba, como ‘devastador’. Asina e ta bisa noticiacla.com diamars mainta den su prome reaccion riba e tema. Ta trata di e noticia unda cu gobernador di e estado menciona, ta obliga tur biahero di paisnan manera Aruba (nivel 2 y 3) pa bay den cuarentena ora nan bolbe New York. Esaki kier men cu tur turista cu bishita Aruba, for di New York, tin cu bay den cuarentena dos siman. Algo cu lo pone un turista asina pensa dos biaha.

DEVASTADOR

“E ta un desaroyo devastador pa  recuperacion di nos turismo y economia” La Sorte ta cuminsa pues na bisa. “ New York ta e mercado principal di Aruba y bishitantenan di e estado no lo por afford di tuma extra dos siman liber di trabou pa quarantine. AHATA lo colabora cu ATA pa busca posibel solucion y alternativa. Mientrastanto mester realiza cu tur proyeccion di ocupacion anuncia te awor pa resto di aña ta demasiado optimista den e circumstancia nobo aki” LaSorte a sigura e portal aki. 

MENSAHE PA MIEMBRONAN

Den un mensahe pa miembronan di Aruba Hotel & Tourism Association dialuna anochi mes caba, LaSorte a comunica e noticia ‘desafortuna’ aki. “E ta un setback pa nos recuperacion di turismo, pasobra New York ta nos mercado principal” LaSorte ta cuminsa na bisa. E ta cita e articulo di e.o. e cadena mericano noticioso ABC  cu ta raportahe e noticia aki. Mescos, e portal aki ta hayando reaccion di multiple caminda caba di instancianan cu ta mustra nan preocupacion pa cu e situacion aki.