Cifra di hospitalisacion pa COVID19 ta sigui stagna y preocupante

ORANJESTAD - Siman ta habri Aruba cu mas hende den ICU atrobe pa COVID19. Por lo menos segun cifranan cu e portal aki a ricibi di hospital Horacio Oduber. E cifranan ta mustra cu e cantidad di persona hospitalisa den ICU ta keda igual, na 12 den sentido cu nan no ta bahando. De hecho e cifranan total tampoco no ta bahando mucho. E ta fluctua entre 35 pa 45, pero no mas cu esey. Dialuna a habri cu total di 44 pashent total hospitalisa pa COVID19. Y si tin un reduccion, manera cu e portal aki a splica diadomingo, no ta nifica cu e situacion ta mehorando.

FORMA DI MIDI

For di prome minister di Aruba Evelyn Wever Croes, ta midi a base di e situacion na Hospital. Esaki den forma di cu tanten cu hospital por maneha e situacion, e situacion na Aruba pa COVID19 ‘no ta for di control’ ainda. E cifranan di contagio for di siman pasa a cuminsa baha, aunke for di informacion cu e portal aki tin di fuentenan fidedigno di hospital, esaki no necesariamente kier men cu en realidad esaki ta nifica un mehoracion den e situacion. Y si nan ta bahando realmente mes, e situacion di hospital ta sigui alarmante. Esaki pasobra, manera cu a raporta caba recientemente, e cifranan di hospital ta poco ‘engañoso’, (misleading), den sentido cu ora cu hende bay cas, esey no kier men cu nan a recupera. Pues no necesariamente kier men cu e situacion a ‘mehora’ pasobra tin ‘menos’ hende den hospital. 

CIFRAS

E cifras mientras cu nan ta keda ‘pega’ entre 35 y 45 hende, no ta mustra e situacion real, den sentido cu kico realmente ta pasando. Cu esaki kier men cu si un dia tin 5 hende ta bay cas, tin 10 ta drenta y asina e ta sigui. Pues berdad e cifranan ta keda igual, of ta subi y of baha, pero ta e fluho di hende continuo cu ta drentando y saliendo ta pinta e situacion real. Pues, tin hopi hende pa dia, cu ta drentando, mientras cu otronan ta saliendo (tene na cuenta cu no necesariamente nan ta bon).