Bononan emiti pa gobierno di Aruba a genera 171 miyon florin

ORANJESTAD – Gobierno di Aruba a ricibi na tur, un total di 171 miyon florin di dos emission di bono (#172 y #173). Asina minister di finanza Xiomara Maduro a confirma dialuna mainta durante conferencia di prensa semanal di prensa. Mas specifico, gobierno a ricibi 100 miyon na florin y 40.3 miyon na dollar. Esaki tabata 7.3 miyon dollar na prome bono y e di dos (#173) tabata bon pa 33 miyon dollar.  Hunto, e ta suma 171 miyon florin. Segun e mandatario tur e bononan ‘a wordo cumpra pa hende local’, aunke no por a specifica ken tur ta esnan cu a paga pa ‘yuda’ Aruba. 

NO MAS BONO

E mandatario riba pregunta di e portal aki, a mustra cu no ta intencion pa emiti mas bono. Pero si dado caso pa ora cu e situacion yega cu ainda no a ricibi placa di Hulanda, lo recuri na otro forma di fiansa, y ta pensa e ora p.e. na un ‘onderhandse lening’, manera e mandatario mes a sugeri awe mainta. E ta conciente, cu cua metodo cu usa, e realidad ta cu lo aumenta e debe. Pero e ta sigura tambe cu lo percura pa no haci nada pa ‘kibra Aruba’. E contesta ey ta relaciona cu e pregunta, con por sigura cu dado momento Aruba no por maneha e situacion y cumpli cu pago bek di e debe nobo genera.