No ta pasobra un pashent di COVID19 bandona hospital, kier men cu e la cura

ORANJESTAD – No ta pasobra un pashent cu tabata hospitalisa pa COVID19 ta ‘bandona’ hospital, ta nifica cu e ta recupera. Asina vocero di hospital Charlaine Huntington a confirma un pregunta recien di noticiacla.com. E hecho cu un pashent ta bandona hospital, tin varios motibo. Y un di esnan mas comun ta cu nan situacion a bira ‘menos grave’, pero no ta nifica cu nan ta liber di COVID19. Esey ta haci cu e anuncio di cu ‘tin menos hende den hospital, ta nifica cu cos ta miho’, no ta completamente real ni corecto y ta duna un bista ‘falso’ di e situacion real. 

CIFRANAN DI HOSPITALISACION

Mientrastanto e cifranan di hospital pa loke ta hospitalisacion pa COVID19 ta sigui preocupante. Mientras cu e cifranan di contagio ta ‘parce’ di ta bahando na Aruba, e situacion na hospital no ta mes alentador. Ta bisa ‘parce’, pasobra e periodo cu e cantidad di contagio ta bahando, ta mucho cortico pa por hustifica realmente un bahada ‘real’. Pa loke ta e cifranan di weekend aki, esaki a keda practicamente identico. Tanto riba diasabra como diadomingo (cifranan cu ta refleha un periodo di 24 ora for di diabierna pa diasabra y diasabra pa diadomingo), e cifra a keda identico na 35. E diferencia ta cu diasabra tabatin 8 pashent nobo cu a drenta, y 2 a sali, y no tabatin cambio den ICU esta cu esaki a keda na 12 pashent. Diadomingo e cifra a keda mescos, pero aki tabatin 4 pashent cu a drenta nobo y 4 cu a ‘bandona’ hospital. Atrobe, e hecho cu a bandona hospital, no kier men cu nan a recupera di COVID19. 

BEADEMING

Tambe tin cu clarifica e situacion di aparato respiratorio (beademing). Tin e pensamento cu ta solamente ora cu un pashent di COVID19 drenta ICU (Cuido Intensivo), cu e ta haya ayudo respiratorio di machine. Esaki sinembargo, segun vocero Huntington, no ta e caso. “No ta tur pashent cu ta riba beademing ta riba ICU. Algun ta hayando ICU zorg riba B3 (piso dedica na pashentnan cu COVID19) tambe y no ta tur pashent den ICU necesariamente ta wordo beademd tambe” Huntington a bisa. “ Pesey nos a hou e terminologia di beademing y no a usa ICU. Dus algun ta ricibi ICU zorg pero riba B3 cu personal di ICU eynan”. Tambe el a splica e parti di bay cas prome cu nan a recupera. “Nan ta bay cas unabes nan no mester di ‘ziekhuiszorg’. Pues porta ainda cu covid pero por caba di ziek uit na cas mes” Huntington a finalisa splicando.