Casonan positivo di COVID19 a baha pero positivity rate ta sigui halto

ORANJESTAD – Departamento di Salud di Aruba (DVG) a registra e di dos cantidad mas abou di caso positivo di COVID19 na Aruba entre residentenan desde cu e di dos ola a cuminsa na augustus ultimo. Apenas 10 persona (e cantidad mas abou tabata 9) a test positivo di apenas 37 test haci na laboratorio. Esaki ta pone tambe cu e positivity rate (e cantidad di casonan positivo entre esnan cu a test) ta keda halto, esta 27% siendo cu e tin cu baha bou di 5%.  

DUNA NOTICIA POSITIVO

Notable tabata cu den fin di siman, minister di Turismo Dangui Oduber a pone un noticia cu tabata mustra positivo, esta cu e positivity rate tabata bahando. Esaki siendo cu riba e mesun dia, esaki tabata mas halto cu e dia prome. Ora cu e portal aki a puntra e mandatario riba esaki, el a splica cu e ta usando e cifra pa siman. Algo cu segun algun experto riba e tereno, a bisa e portal aki cu no por ta asina. A splica cu e positivity rate mester baha consecuentemente pa 3 siman largo, prome cu por determina cu e ta ‘enberdad’ bahando, sino ta dunando informacion eroneo. E informacion cu e mandatario a pone, sin clarifica e calculacion di con el a yega na e cifra, a duna e chens pa un interpretacion cu no ta corecto.

CANTIDAD DI TEST

Loke tambe tin cu tene cuenta ta cu a test hopi menos hende e dianan aki. E portal aki den siman a raporta caba cu esaki ta mustra di ta pasobra tin scarsedad di test na Aruba (cu minister di Salud Oduber a confirma), y cu pa e motibo ey, hospital ta limitando e cantidad di hende cu por test. E portal aki no por a comproba esaki oficialmente, pero di parti di su fuentenan fidedigno na hospital, tur cos ta mustra den e direccion aki, cu ta splica e cantidad abou di test cu ta tumando lugar. Loke ta hala atencion ta cu aunke cu e cantidad di test ta abou, esnan positivo ta halto (manera a splica ariba). A compronde di gobierno cu diadomingo atardi riba buelo di KLM, un cargacion nobo di test lo mester ta yegando Aruba, y ta spera cu entrante dialuna, e cantidad di test lo por aumenta. Lo tin cu wak cu si den siman (a partir di diamars awor) e cantidad di hende cu ta test, aumenta. Si aki esey no ta e caso, posiblemente 'por' cuminsa pensa cu enberdad e casonan di contagio ta limita. Di otro banda, fuentenan a sigui bisa cu como cu tin cu haci cita, no por comproba cu si enberdad e cantidad a bira menos, of si ta deliberadamente ta test menos hende, pa duna indicacion cu tin 'menos' hende cu ta birando malo di COVID19 of cu ta posiblemente infecta. "Di berdad, nos no ta spera esaki", e fuentenan a bisa e portal aki. 

RESTO DI INFORMACION 

Segun resumen di awe di DVG, por tuma nota cu 119 persona mas a recupera, total di activonan a baha cu 107 persona y ta na 871 awe, total di testnan haci ta 195, testnan haci bou di residentenan na laboratorio di hospital ta 37 y total di caso di fayecimento relata na Covid-19 ta keda mescos, 25.

HOSPITAL

Hospital ta informa cu tin un total di 43 persona interna di cual 12 ta den cuido intensivo y 31 ta isola riba piso general.