Wever Croes: Aruba wardando ainda riba contesta di Hulanda

ORANJESTAD – Gobierno di Aruba ainda no a ricibi contesta di Hulanda ainda pa e prestamo ‘extra’ pa cubri e buraco cu a bin pa loke ta pagonan di juli y augustus ultimo.Y for di reaccion di e prome minister di Aruba, e rosea financiero no ta wanta mucho mas, prome cu tuma e  decision pa usa e fondo genera cu e emision di bono. Si haya e placa di Hulanda, e portal aki a compronde di e prome mandatario, cu lo no usa e placa di e bono.   

BONO

Berdad cu Aruba a logra haya placa di bono, pero e placa ainda no a drenta ‘fisicamente’ riba cuenta, y tanten cu e no drenta, no tin cu paga interes. Asina cu usa e placa, e interes ta cuminsa core. Pues ta spera cu no mester haci uso di dje, segun Wever. Ora cu a puntra e mandatario, cuanto dia of luna por warda ainda riba Hulanda, e mandatario a bisa cautelosamente “Nos no por pospone e decision mucho dia mas, sino mester usa e fondonan genera pa e bono, pasobra nos no por permiti pa rosea financiero caba”. Esaki segun Wever, pasobra e placa ta necesario pa paga loonsubsidie y fase. “Dus ta echt hele korte termijn” Wever a sigui bisa. 

USO DI PLACA LOCAL

Mientras cu a ricibi e prome 100 miyon genera di e bononan recien riba tereno local, fisicamente e placa no a yega ainda, sino ta djis inscribi e interesadonan a inscribi. Unabez cu usa e placa, e interes ta cuminsa core. Manera cu e portal aki a raporta caba tambe, gobierno a emiti mas bono diahuebs, cu lo genera aun mas placa local (florin) y posiblemente dollar tambe. Cuanto, no ta conoci ainda. E intencion ta pa genera por lo menos 200 miyon florin na tur, cu ta mas of menos e suma cu gobierno mester di dje pa cubri e buraco.  

HULANDA A PRIMINTI PERO NADA AINDA 

Tabata siman pasa ainda cu secretario di estado Hulandes Raymond Knops a confirma den un conferencia di prensa pa prensa di Aruba, cu Aruba por haya e placa aki tambe (e extra) si nan sigui e caminda via CAFT. Riba esaki, Wever a bisa e portal aki  den un otro entrevista, cu Aruba a informa Knops cu nan a cana e caminda aki caba, pero no a tende nada mas. Awor nos ta dos siman mas leu y ainda no a tende nada di Hulanda riba e placa aki. 

WARDANDO

“Desde e dia ey Aruba ta wardando riba Hulanda su contesta si di berdad Hulanda ta dispuesto pa presta Aruba e placa aki mirando cu Hulanda su interes ta 0 porciento. Pero si Hulanda tarda mucho mas, Aruba ta tuma e placa cu a haya riba mercado local pa asina por sigui cumpli cu compromisonan. Esaki a pone cu Aruba tawata tin e posibilidad pa paga salarionan sin problema, pa habri inscripcion pa loonsubsidies, y cuminsa traha riba e pagonan di FASE pa luna di september. Apesar di tur dificultad, Gobierno di Aruba ta cumpli cu su compromisonan”, Prome Minister Evelyn Wever-Croes a duna di conoce.