Openbare Avondleergangen Aruba beroepsonderwijs a cumpli 60 aña di existencia

ORANJESTAD - Dia 10 di januari 2015 ta precisamente 60 aña pasa cu na Aruba a cuminsa educa personanan hoben y adulto den diferente ramo tecnico durante oranan di anochi. Ariba 10 di januari 1955 Arubaanse Technische School (ATS) a cuminsa organisa diferente opleidingnan tecnico durante oranan di anochi den e edificio mihor conoci como John F. Kennedy School. E tempo ey 145 studiante a inscribi pa diferente opleidingnan, di cual 110 studiante tabata empleado di Lago. Esaki tabata e prome grupo ricibiendo les anochi den ramo tecnico. E lesnan e tempo ey a wordo duna riba dialuna, diamars y diaranson anochi di 6.15’or pa 9.15’or di anochi.  

Na 1987 Openbare Avondleergangen Aruba (OAA) afdeling beroepsonderwijs a sigui cu e tarea aki ofreciendo pueblo di Aruba e oportunidad pa siña un ofishi durante oranan di anochi. OAA beroepsonderwijs ta brinda diferente opleidingen, di 6.30’or pa 9.40’or di anochi, unda hoben y adultonan por sigui desaroya nan mes den e sector tecnico, siñando un ofishi. E ta un school pa hende homber y hende muher, y nos ta duna tambe opleidingen di mode-ontwerper y cosemento basico y avanza. Un instituto educacional subsidia door di gobierno y bou di supervision di Directie Onderwijs inspectie y examenbureau. Actualmente OAA beroepsonderwijs ta usando e facilidadnan di EPB Hato y San Nicolas. Tanto na EPB Hato y EPB San Nicolas e siman aki nos alumnonan di e opleiding Welder A y B lo ta bezig cu nan examen. Director y staff di OAA ta desea tur studiante tur clase di exito cu nan examen.

Dia 8 di februari lo cuminsa cu un par di opleidingen cu ta: Welder A y B, Welder MIG/MAG. Interesadonan por yama na telefon 582-7324 of nan por bishita nos website www.oaa.aw. E rekisitonan pa drenta school ta cu mester: tin minimo 16 aña di edad, entrega un registracion di Censo di 5 florin, tin un pasfoto. Tuma nota cu depende di cada opleiding lo por tin diferente exigencia aditional. OAA Beroepsonderwijs ta felicita tur ex- graduado, ex-pensionado, staff, personal y tur studiante cu e celebracion aki. Tambe ta gradici tur esnan cu di un forma of otro a contribui na e desaroyo di OAA Beroepsonderwijs.