Maduro: A saca mas bono na florin debi na hopi interes

ORANJESTAD – Gobierno diahuebs a saca un bono extra cu intencion pa genera mas fondo na florin, despues cu siman pasa a saca e prome (cu e meta specifico pa tapa un buraco financiero crea recientemente).  Asina minister di finanza Xiomara Maduro a confirma pa noticiacla diahuebs anochi. Ta trata di bono na balor di 40 miyon florin y 50 miyon dollar respectivamente, tambe na 5.3% di interes y 7 aña pa paga bek y tin te awe tardi 4’or pa participa. 

PAKICO MAS BONO

E motibo segun Maduro ta cu “a bin hopi inscripcion pa florin, y esun di dollar mayoria a drenta laat. Y pesey awor (nan) ta haya chens den e tanda aki”. “E (suma di) 400 (miyon) ta e necesidad financiero te December. E no ta locual a pidi pa lanta di e mercado cu e emicion di bono. Tabata 60 florin y 50 dollar” e mandatario a sigui bisa. Awe por a mira e publicacion den medionan di comunicacion. 

OPINION FINANCIERO

Opinion financiero riba e tema ta varia mientrastanto entre esnan cu e portal aki a papia cu ne. Y esaki ta no obstante e splicacion di e mandatario, di pakico emiti un di dos bono. Tin ta mustra cu a bay pa un di dos bono, pasobra den e prome no tabatin suficiente interes. Y nan ta pensa asina a base di e hecho cu awor a baha e cantidad (40 y 50 envez di 60 y 60). Otro ta bisa cu esey no ta berdad, y cu a simplemente opta pa bay di 60 pa 100 na florin y cu esun di dollars ta wordo reduci di 60 pa 50 (miyon). Tambe tin ta bisa cu e hecho cu a pone un bono extra den florin ta pasobra tin mas interes den esey, pero cu a baha e cantidad, ta posiblemente pasobra ta lo a nifica cu tin cu paga menos na interes e ora.Hecho ta cu tin mas interes den e parti di florin compara cu e parti dollar, aunke cu Maduro ta bisa cu esnan pa dollar tambe tabatey, pero cu esaki a drenta laat. Lo tin cu mira awor si esaki enberdad ta e caso y cu den e di dos biaha, si ta logra haya esun di dollar (na tempo). 

CUANTO PLACA GOBIERNO MESTER

Tabata conoci cu gobierno a purba bay pa total di 169 miyon florin (pa cubri e buraco crea na juli y augustus ora cu Aruba no a haya placa di Hulanda y mester a ‘schuif’ pagonan pa mas laat). Esey a pone cu awor si gobierno mester paga e suma (debe) ey. A opta pa tuma e caminda aki ya cu segun Aruba, Hulanda a nenga inicialmente pa yuda cubri esaki. Na caminda Hulanda a bisa Aruba cu ta dispuesto pa haci tal, pero cu mester sigui e caminda corecto (via CAFT: red), No ta conoci si gobierno a inicia e caminda ey, y si ta bay logra. Esaki pasobra prome minister Wever a bisa e portal aki recientemente cu a haci e peticion caba, pero no a haya reaccion. Pa e asunto awor, manera Maduro mes a bisa, e prome emission a genera 100 miyon florin. Pero ta conoci cu Aruba mester mas. Asina mes, a mustra publicamente cu e 100 miyon pa awor ta suficiente pa cubri dos luna (September y October), y cu a ‘sobre’ inscribi, den sentido cu a pidi 60 miyon y a haya 100 miyon. Pero no a haya esun na dollar ‘ainda’. Ta spera cu awor, lo por sosode mescos cu a sosode den e prome ‘intento’, unda cu envez di 50 miyon dollar, ta haya dobel di esey.