Laborant Hulandes ta conta di su experiencia cu COVID19 na Aruba

ORANJESTAD – “Tin poco personal, pero na laboratorio nos ta haya dobel e cantidad di material aden. Dokternan ta alerta ciudadanonan di e isla via rednan social y television, ta laga mustra imagen di pashentnan malo y ta haci yamada pa tur hende keda paden. Puro panico” Asina un trahado Hulandes trahando na laboratorio di hospital na Aruba ta describi e situacion na Aruba pa e portal Hulandes ‘indebuurt.nl’. Bou di e nomber ‘Ellis’, e ta describi e situacion di COVID19 cu e ta experenciando na Aruba desde cu e la cuminsa traha den laboratorio na juli di e aña aki. 

BIBA NA ARUBA

Ellis ta un di e hopi nan cu a cambia Hulanda pa Aruba pa un aña, pa asina disfruta di e calor di e isla. Mescos cu ne, tin hopi cu ta haci mescos. Den caso di Ellis, el a dicidi aña pasa cu e lo bin Aruba pa traha pa un aña. E tempo ey no a pensa cu tabatin coronavirus, ni e situacion rond di dje. Asina mes el a bin Aruba e aña aki y a cuminsa traha na e laboratorio di hospital. E loke e ta conta, no ta nada nobo, pero si interesante di un punto di bista di un trahado den laboratorio. E unico parti cu ta relata di su trabou directo, ta loke ta conoci caba, esta e yamada urgente di hospital y e ta confirma cu tin panico completo den hospital. 

GOBIERNO TIN PROBLEMA

Loke ta hala atencion ta su relato pa cu e forma con Aruba ta anda cu esaki, specificamente, gobierno. “Nan  no sa mas kico pa haci pa baha e cantidad di contagio” Ellis ta sigui bisa. E ta sigui papia di e menasa di gobierno pa re-introduci un lockdown den dos siman si e cifranan no baha. E ta mustra cu contrario na Hulanda, (cu por transferi pashentnan pa p.e. Alemania si nan yena), Aruba no tin e opcion pa ‘traslada pashentnan otro caminda’. Ta un hospital tin, y e islanan den cercania ta cera pa trafico. Ellis ta sigui relata su experiencia personal y ta sigura cu toch e lo sigui na Aruba y ta pasando bon, no obstante e situacion. E ta conciente di e peligernan y ta cuida su mes bon. “Mi por a contrea e virus unda cu ta” Ellis ta bisa, indicando cu no ta importa si ta na Aruba of otro caminda. Lesa e articulo completo AKI. cortesia di e portal indebuurt.nl