ASTEC: Pakico no por duna sindicato mas di loke nan a haya caba

ORANJESTAD – No obstante e hecho cu e trahadonan di waf (lesa ASTEC) tin e miho CAO y salario halto, ainda e sindicato ta bogando pa mas aumento y mas beneficio. Un siman despues cu NoticiaCla.com a raporta riba e problema riba waf relaciona cu e impasse entre Astec y e sindicato UPA (Union Portuario Arubano), gerencia di e compania stewado, a reacciona awe publicamente riba e situacion. Aki e gerencia ta mustra riba nan esfuerso pa complace e sindicato y su miembronan, y kico tur nan a haci pa logra esaki. Mes momento nan ta mustra cu e sindicato no ta satisfecho y kier mas. Y cu un menasa di pone waf plat, sindicato kier sigura cu e compania ta cumpli cu e ‘loke cu nan tin derecho riba dje’. E discusion actual ta 1000 florin cu falta riba paycheck di tur e trahadonan , pero cu ASTEC no kier paga, segun e sindicato.

ASTEC ta confirma cu e ultimo contracto colectivo entre U.P.A. y ASTEC a vence fin december 2014 y cu lastimamente ASTEC y U.P.A. no a logra yega na firma un CAO nobo di acuerdo cu e protocol di e ultimo CAO. Pesey no tin ningun palabracion pa cu e suma aplicabel di un aumento di salario pa aña 2015, ni tocante e pago di un “Bashi Premie” pa 2015. Asina mes ASTEC a dicidi, di buena fe, di duna un aumento general a base di e Protocol den forma di un evaluacion di prestacion di e trahado cu lo ta un porcentahe te cu 2.4 % y a paga un “Bashi Premie” pa aña 2015 den e prome siman di januari na e suma di Afls. 2.000,=.

Segun e compania, cu implementacion di e aumento pa aña 2015 y e “Bashi Premie” ASTEC a sigura su trahadonan un salario y beneficionan excelente y conforme e mercado y desaroyonan rond di costo di bida. Segun Centraal Bureau di Statistiek, durante e ultimo añanan NO tabatin un aumento den costo di bida, al contrario, no por papia di inflacion sino di deflacion. Ademas, cu esaki, ainda e pakete di beneficionan di ASTEC ta keda uno excepcional, den comparacion cu tur otro riba nos isla. Miembronan di U.P.A. ta gosa di tremendo salario y beneficionan anual. Un sondeo profesional a mustra cu den mercado laboral, posicionnan similar ta paga generalmente hopi mas abou.

Como si fuera poco, banda di un salario halto tur luna y e Bashi Premie, e trahadonan di ASTEC riba waf tambe ta haya un “Presentie Premie”, un luna completo di salario di Vakantiegeld, un luna completo di salario como Bonus fin di aña y un contribucion na pensioen di 11.7% di salario. Tambe tin hopi otro beneficionan secundario pa e trahadonan, incluyendo overtime na 200% riba salario regular pa overtime traha den orarionan di anochi y weekend. Ademas ta paga overtime na 300% pa overtime traha riba “working holidays”.

Despues e compania ta splica pakico nan no por haci mas, di loke e sindicato ta pidi, cu ta primordialmente e mudamento di e waf pa Barcadera. Segun ASTEC, mientras cu nan ta haciendo tur lo posibel pa mantene paz laboral na pia di trabou, no por kita for di e realidad cu e compania ta memey di e proceso di muda waf di carga di Oranjestad y desaroya un waf moderno na Barcadera, cu tur e retonan y presion financiero cu e ta trece cune. ASTEC ta spera di por conta riba cooperacion di sindicato UPA segun palabracion haci den e protocol.

Tabata siman pasa cu trahadonan di (Aruba Stevedoring Company) Astec NV a wordo conseha pa no bay den accion ‘ainda’, door di mediado di gobierno Anselmo Pontilius. Ta trata di e grupo di trahado cu ta baha y subi carga for di bapornan. Mediado di gobierno Anselmo Pontilius a confirma na NoticiaCla.com cu e situacion tabata tenso berdad, pero e la spera cu e caso sumario cu trahadonan kier a entama pa forza pago di resto di e bashi premie, lo por a trece claridad den e situacion laboral di e compania. E problema principal ta un ‘fayo’ den pago di bashi premie, di 1000 florin. Trahadonan a sinti falta di e suma aki den nan salario siman pasa dialuna (cu normalmente ta 3000 florin pa persona), y a mustra nan malcontento mesora. Un diferencia di opinion cu e gerencia a pone cu e diferencia den e suma no a aparece riba e ‘pay slip’ di e quincena.

E trahadonan mesora a mustra cu nan ta demanda e gerencia den corte, pa medio di un caso sumario, y mientrastanto nan ta drenta accion pendiente e resultado. Pontilius ,-cu a wordo pidi pa intermedia fin di aña pasa ora cu negoshacion di CAO a peg-, ta mustra cu un accion awo no ta e miho paso. Por lo menos, no mientras cu partidonan ta den corte.