Cruz Cora a ricibi donacion generoso di compania di utilidad

Posted on 09/24/2020 11:55 am AST | Updated on 09/24/2020 11:56 am AST

ORANJESTAD - Ayera mainta gerencia di Arugas a bishita Centro di Cruz Cora na Dakota pa haci un donacion hopi special. Sr Roberto Geerman director di Arugas y Sr. Paul Arends gerente di operacion a ser ricibi pa director di Cruz Cora Sr. Michel La Haye. Un cheque di Afl.10.000 a ser entrega na Sr. La Haye kende a keda sumamento contento cu e donacion, specialmente awor cu Cruz Cora a extende su programa di asistencia di cuminda na famianan mas vulnerabel cu a perde nan entrada door di e pandemia di Covid-19. Cruz Cora lo aumenta su esfuersonan na Aruba y enfoca riba yuda famianan den necesidad cu E-vouchers pa cuminda y cuminda cayente pa esunnan cu no por cushina. 

Den e prome fase di e programa di ayudo aki, Cruz Cora a entrega 4500 famia E-vouchers. Awor den e di 3 periodo di registracion ya a ricibi mas cu 6000 peticion. Esakinan aworaki ta wordo yama y ta wordo evalua, ya cu tin preferencia pa yuda casonan mas vulnerabel. Arugas ta contento cu nan donacion lo sirbi como apoyo directo na esnan mas afecta den e pandemia aki di Covid-19. 

  • Powered by SETAR