Segun crisis team situacion di COVID19 na Aruba ta miho, pero, e realidad por ta otro

ORANJESTAD – Manera cu e portal aki a raporta diaranson anochi, gobierno y COVID19 crisis team a opta pa no tuma mas medida drastico pa Aruba, debi cu e situacion no ta rekeri esey. Mas specifico, cifranan di contagio no ta rekeri esey.  Asina minister Dangui Oduber a contesta NoticiaCla.com riba e su pregunta durante e COVID19 briefing. E comentario aki a sorprende hopi, pasobra tabatin e ‘impresion’ cu cos tabata mustra malo, den sentido cu cifranan no a baha manera cu mester ta. Un encuesta recien di e portal aki, ta mustra tambe, cu e ‘percepcion’ entre e usuarionan di e portal aki, cu e pandemia ‘no ta bou di control’. Y un raportahe di Caribisch Netwerk riba e situacion na e.o. hospital, tambe ta ilustra un otro bista, unda cu ta bisa cu e situacion ta leu di ta ‘bou control’. Tur esaki ta pone cu mientras cu gobierno y crisis team ta ‘cautelosamente optimista’, no tur ta di acuerdo cu e pensamento aki. 

PERIODO DI EVALUACION

Diaranson anochi e periodo di dos siman cu gobierno a pone pa ‘evalua’ e situacion, a vence, despues cu e cantidad e tempo ey (2 siman pasa) a yega (pa e dia ey) e record di 141 caso. 

CANTIDAD DI CASO

Durante e briefing, epidimiologo Garreth Tromp di DVG a confirma cu e cifranan di casonan positivo na Aruba ta halto. Algo cu e mandatario di salud tambe a admiti. “Pero di otro banda, nos ta mira cu e casonan positivo ta bahando” e mandatario a bisa. Mientras cu esaki por ta berdad, un raportahe ayera di e portal aki, ta mustra cu hopi, e cantidad no a baha. E average di casonan pa dia tabata 80, e dos siman prome cu a  cuminsa e evaluacion, y durante e periodo di evaluacion cu a caba ayera, segun investigacion di e cifranan cu e portal aki a haci, esaki a baha te na 77 caso average pa dia. 

META PA BAHA CANTIDAD PA 30 CASO

Tambe, minister Oduber ta bisa cu nan meta ta pa baha e cantidad di caso pa dia te na 30. E positivity rate, tabata halto siman anterior te na 45% (e cantidad di casonan positivo compara cu e cantidad di hende cu a test), mientras cu esaki mester ta menos cu 5%. E siman aki e la baha te  na 25%, cu segun e mandatario tambe ta un señal positivo ya cu ‘e ta bahando’. Pero manera cu e portal aki a raporta, e no ta ni cerca di loke e mester ta. 

MEDIDA MAS DRASTICO

E mandatario a ripiti cu enberdad a bisa dos siman pasa cu lo a evalua si tabata necesario pa bin cu medidanan mas drastico pa reduci e contagio.” Nos ta sinti cu e medidanan cu nos a tuma siman pasa, nos lo mira e resultado den e proximo siman. Nos no a sinti e necesidad pa tuma mas medida drastico, y nos hospital no ta bou di e presion cu nos ta sinti e necesidad pa sigui tuma medida mas drastico” Oduber a bisa. Segun e mandatario, hospital tin un capacidad di e seccion di COVID19 di 60 cama, y tin 29 persona interna. Pues ainda tin espacio. “Nos a bisa desde un principio cu si nos ta sinti e urgencia, e necesidad pa tuma mas medida, nos lo tuma mas medida!. Pero te cu awe cu nos tabatin e crisis team meeting un rato pasa, nos no a sinti e urgencia y necesidad pa tuma medidanan mas drastico” Oduber a bisa. E ta referi na e cifranan di siman pasa diaranson pa ayera, cu e cantidad di casonan positivo ta bahando. “Pesey nos a bisa cu nos ta cautelosamente optimista. Nos no por conclui ainda cu esaki ta e trend cu ta bay sigui”, e mandatario a sigui bisa. 

ENCUESTA

Algun dia atras, e portal aki a publica un encuesta entre su usuarionan unda cu mayoria a indica cu nan ta considera cu e situacion di COVID19 ta ‘for di control’. E ta un percepcion, pasobra interesante ta cu mayoria cu ta bisa esaki, no a keda infecta. Pero esey no ta kita afor cu nan ta pensa cu e situacion ta for di control. Aunke cu gobierno ta duna otro indicacion, a base di nan indicadornan scientifico, pueblo parce ta pensa otro. Y no ta intencion di haci sensacion, pero e percepcion, hopi biaha ta debilita un persona di wak algo di otro forma. Den un raporta ayera cu e portal aki a publica, por mira cu enberdad cifranan a baha un poco, pero no constantemente sino a pega na un otro cifra average. No ta mira un caida constante y esey ta pone hopi hende pensa cu cos ta leu di ta bon. E cantidad di storianan cu ta tende di personanan cu a test, a haya COVID19 y nan experiencia, ta duna full un otro bista di cu e situacion ta contene y cu esnan cu ta manehando e crisis, sa kico nan ta haci. Mester bisa acerca cu enberdad, ningun hende ta pretende di ta un experto, incluyendo e expertonan medico. Pero manera cu a puntra e prome mandatario recientemente cu ta lidera e crisis team, riba e tema di sugar coating, el a sigura e portal aki cu esey no ta bon y cu e sigur, lo no haci esey. Esey no ta kita afor, cu e por bisa cosnan cu ta duna e comunidad ainda un tiki di confiansa cu nos ta bayendo basta bon y cu no mester perde speransa. 

HOSPITAL

Hospital tambe ta manda señal cu cos no ta bou di control. Por lo menos e parti cu ta toca nan. Gritonan di varios specialista riba rednan social y depues video di propio hospital cu mas mensahe fuerte y dramatico, ta confirma cu e situacion definitivamente no ta bou di control. Berdad cu ‘ainda’ tin ‘suficiente’ cama, pero e personal y material no ta suficiente, aunke internista y miembro di OMT di hospital, Bert Rodenburg a desmenti diaranson anochi na e portal aki cu tin ‘escases di material’. Den un articulo di Caribisch Netwerk recientemente, e persona encarga temporalmente, Freek Korver mes ta referi na multiple crisis pareu den hospital. Y COVID19 ta un di nan cu ta pone e situacion aun mas agudo. Den un otro relato, e portal aki lo ilustra cierto puntonan cu ta toca e parti aki, mas specifico.