Oduber: No ta necesario pa aumenta medida pa COVID19

ORANJESTAD – No ta necesario pa aumenta e cantidad di medida pa combati COVID19. Asina minister di salud Dangui Oduber a contesta noticiacla.com diaranson anochi durante e briefing pa COVID19. Manera cu e portal aki a raporta anteriormente, awe e periodo di 2 siman di evaluacion a vence. Pero mirando e situacion, cu e casonan positivo a cuminsa baha, ta sinti cu ta bayendo riba un bon caminda. Ta cautelosamente optimista, no obstante cu e cantidad di caso ainda ta halto. Y ta mira tambe cu e positivity rate tambe ta bahando. Esaki segun Oduber, tabata 45% y esaki a baha te na 25%.