Dobbel cantidad di detencion y multa durante fakkel compara cu aña pasa

ORANJESTAD – Polis a detene mas hende y duna mas multa durante e parada di flambeu diasabra, compara cu e cu e ultimo dos paradanan. Cu 27 detencion na tur, (mayoria hobennan pa buracheria) y 15.450 florin na multa, por bisa cu polis tabatin un anochi hopi ocupa. Esaki ta confirma cu e maneho di “Faya bo Haya” a funciona y lo continua durante tur e otro eventonan di carnaval. Esaki lo inclui accionnan di listramento preventivo y multanan halto na momento di comete in fraccionnan durante eventonan carnavalesco

Aña pasa, durante e mesun evento aki di Fakkel Optocht, Polis a detene mesun cantidad di sospechoso compara cu aña 2013, esta 10 persona. E tempo ey a colecta un total di Afl 7.190,= ma multa, cu tabata como tres bes mas hopi cu e aña anterior. Cu esey a imagina cu esunnan cu no por comporta nan mes bon, lo tene mas cuenta durante eventonan di e aña aki.

Cu mas di 6 mil participante den 10 grupo di carnaval, e Fakkel Optocht a cuminsa exactamente 8:00pm for di ex edificio di DOW den Paardenbaaistraat. Polis a percura pa un total di riba 130 Polis riba pia pa guia e parada, mientras cu si conta tur e demas Polisnan trahando pafo di e evento, ta yega na mas o menos 200 Polis trahando activamente pa brinda siguridad na nos comunidad.

Cuerpo Policial Aruba a haci uzo di varios departamento durante e prome parada di carnaval 61, manera ta Polisnan uniforma di varios districto, pero tambe a uza departamentonan special manera Polisnan cu ta atende cu cachonan K9, Mobiele Eenheid, Team di Aresto, Polisnan riba brommer pa atende cu trafico y departamento di recherche tabata activo riba e ruta di e parada den cayanan di Oranjestad.

 Di acuerdo cu cifranan oficial, na tur a detene no menos di 27 sospechoso durante e prome evento di carnaval, di cual nan edad ta varia entre 17 pa 62 aña. Ningun di e detenidonan tabata den parada, pues tur tabata den banda of a drenta causa problema den e parada. E multa mas abou tabata di Afl. 300,= mientras cu esun mas halto ta di Afl. 2.300,=. Na tur Polis a cobra e suma di Afl. 15.450,= e aña aki durante un solo evento carnavalesco. E delitonan cometi ta varia entre posesion di droga, bringamento, posesion di arma den forma di cuchiu y sker, buracheria publico, no sigui ordo di Polis, maltrato y strobamento di trabou di Polis.

Hunto cu Ministerio Publico, lo sigui aplica e mesun maneho aki durante tur e eventonan di carnaval. Polis ta convenci cu no solamente e tin un bon resultado represivo pa evita escalacion di problema, pero tambe preventivo. A nota cu den trafico tabatin menos incidente, probablemente pasobra automobilistanan ta birando mas consciente di nan responsabilidad y di e chens grandi cu Polis lo gara nan burachi tras di stuur y e consecuencianan cu esey lo tin pa nan.