Awe Crisis Team lo mester anuncia si ta tuma mas medida pa COVID19

ORANJESTAD – Si tur cos ta bon, diaranson anochi Crisis Team y gobierno mester anuncia si ta bin cu medidanan adicional of no pa e crisis di COVID19. Awe e dos siman ta vence cu a pone pa ‘evalua’ e situacion y pa wak si ta logra baha e cantidad di casonan positivo. E realidad ta cu esaki, segun analisis di e portal aki, mientras cu e average pa dia a baha cu 10, ainda e ta hopi halto. Si tuma e 9 dianan prome cu e fecha cu a anuncia esaki, e tabata un average di 80 caso pa dia.  Si tuma average di e casonan awor di e ultimo 14 dianan,  esaki ta casi 77 caso pa dia, cu sigur ta un cifra halto aunke 10 menos. E casonan tabata subi, baha y subi, y subi algun biaha den forma basta halto. Y pa por bisa cu e cifranan ta bahando, esaki mester a sosode den un patronchi sigui, structuralmente. Esey no tabata e caso aki. 

E PATRONCHI

Ora cu gobierno a anuncia cu ta bay analisa e situacion durante e 2 simanan aki, e dia ey, tabata pasobra a registra un cifra record pa e dia ey di 141 caso positivo riba un dia. E la baha despues si, pero esaki tabata debi na e dia di siman. Tin un patronchi caba cu ora cu yega fin di siman, e casonan ta baha basta drastico, pa despues ora cu siman habri, esaki subi basta drastico. Den fin di siman, e casonan a baha te na 14 caso riba un dialuna (testnan di diadomingo), solamente pa subi explosivamente te 92 caso, y pa completa e obra, yega su siguiente dia pa un otro record nobo di 176 caso positivo. E la baha y subi, unda cu a yega e top di 91 caso y mas abou pa 36. Pero atrobe, despues di 36 (cu tabata test di weekend), esaki a subi te 76 caso positivo e siguiente dia. Pues, segun e analisis aki, e situacion no a mejora. Claro, cu e ekipo por busca otro forma, manera e parti di testnan negativo, e cantidad di testnan haci, hendenan cu a recupera, pero pa e portal aki, a bisa claramente cu e proposito ta, cu mester ‘baha’ e cantida di casonan positivo. 

MORTO

Pa loke ta e parti di morto, den e dos siman aki, tabatin 10 morto, por bisa cu e average tabata 1 morto pa dia, cu sigur ta hopi. Y mirando e parti di hospitalisacion, cu tambe no kier baha, por spera cu esaki lo poco poco aumenta na 2 morto pa dia. De hecho, tin 5 dia riba cual tabatin dos morto registra, y di e 5 dianan ,3 di e dianan tabata den e periodo di 2 siman, esta cu tres dia (2 dia sigui) tabatin 2 morto raporta. Y esaki tabata practicamente na final di e periodo di dos siman. Pues e pensamento cu e por aumenta, ta birando realidad, lamentablemente. Lo mester keda positivo, y wak si sin ningun medida extra, e cantidad riba su mes por baha, of si e crisis team ta haya necesario, pa tuma medida extra pa baha e casonan na un nivel acceptable.