Giannis Group: E demostracion a refleha riba nos amor pa e trabou

PALM BEACH -  “ E demostracion a refleha riba nos amor pa e trabou protesta di varios restaurant diasabra ultimo”. Asina un comunicado di Giannis Group (doño di varios restaurant y bar riba e strip di Palm Beach,ta bisa. Segun e comunicado,   diasabra dia 19 di september, tabata sigur cu si un anochi sumamente emocional pa tur empleado y doño di restaurant nan situa na Palm Beach riba e strip di nos High rise Hotels. “Di un momento pa otro emocion nan a bolter, no solamente cu doño nan cu mester cera nan porta pero tambe cu empleado nan cu no ta logrando cera nan cuenta fin di luna. Empleado nan a dicidi di walk-out!!.Tur hende a bira emocional cu tur nan derecho obviamente”.

REUNION CU MINISTER

Dialuna mainta Sr. Jan Van Nes di Aruba Food and Beverage Association y Sr. Daniele Ferrara di Giannis Group a topa cara cara cu Sra. Mr. Xiomara Ruiz – Maduro, Minister di Finansas, unda cu segun e grupo, claramente e la expresa cu e ta compronde nos frustacion como empleado y como doño di trabow den sector horeca na Aruba. “Nos mester bisa honestamente nos a sinti empatia cu e la compronde nos y pakico nos empleado nan a hasi e demostracion riba diasabra 19 di september.”

SALARIO

Segun e comunicado, e empleado nan di restaurant ta cobrando menos pa luna como part timers, y cu e medida nobo nan awor ta pone esaki na menos ainda. E horario di Toque di Queda no ta pa haña dos hora mas di benta sino pa haña mas hora pa traha y tin balanse y sobrevivi, e comunicado ta sigui bisa. 

TRABOU DURO

“No tin nada mas erg pa un doño di trabou entrega su sudor di traha duro despues di tanto aña hunto cu su empleado nan, hopi di nos a cuminsa cu nada. Awo cu e ora nan cambia y e crisis riba su mes di Covid-19, por bin na resultado  cu nos sudor por hasta evapora,  den otro palabra desparece manera nada”. 

DESEO PA BALANSE

Nan kier laga nos comunidad di restaurant sa, nan e “comrade nan” manera nan ta bisa, cu nan ta desea un balanse y nan tur kier yuda Aruba bai dilanti pa  sali for di e momento desagradable aki. “Mirando siman tras di siman un otro bisiña ta cera porta, esaki no ta algo lo normal y e ta crea precupacion y emocion, pero no positivo”. 

E SITUACION 

Segun e comunicado, pa e simple echo pa nan sobrevivi riba e Isla aki cu ta asina bunita y cu tanto potencial, nan kier laga sa cu nos ta compronde cu e “2 ora”  nan ey ta manera “oro,”. “Pa hopi di nos e por trece un pan na mesa, un paki lechi mas pa un criatura. Di curazon nos kier pa tur hende sinti cu tin compasion y cu solamente nos tur ta un equipo hunto pa sirbi nos hendenan local y turista for di exterior, cu pa awo ta e unico sector pa steun riba dje te ora nos bin cu idea nan nobo. Nos tur ta hasi nos trabou den horeca cu tanto amor cu tanto nos tin den sanger y cultura, no ta solamente un walk – out a tuma lugar diasabra, pero tambe nos curazon a kibra na e momento. E  demostracion a refleha riba nos amor pa e trabou pero tambe nos unidad como pais y  cu nos kier bai dilanti y sali for e esaki hunto door di uni y hasi cambio nan positivo hunto, esta cu nos lidernan di nos pais y nos propio pueblo” e comunicado ta finalisa bisando.