Cantidad di hospitalisacion pa COVID19 na Aruba no kier baha

ORANJESTAD – E cantidad di casonan di hospitalisacion parce di no kier baha na Aruba. Si el a baha, e no ta bahando bou di e cifra di 35 caso di hospitalisacion. Segun cifranan suministra pa Horacio Oduber Hospital diamars (awe), atrobe tabatin 2 hende mas hospitalisa pa ICU (total 10) mientras cu 1 a sali, y den seccion ‘general’, 5 mas a drenta (total 35) y 4 a sali. Pues mientras cu enberdad tin hende ta sali, hopi biaha e cantidad cu ta drenta, ta surpasa esnan cu ta sali. E realidad segun fuentenan fidedigno di hospital a splica e portal aki, hendenan enberdad ta ‘bandona’ hospital, pero esaki no kier men cu nan a recupera. Simplemente ta manda nan cas cu p.e. oxigeno, pa asina traha espacio pa esnan mas critico. Pero no cu nan ta bandona HOH pasobra nan a recupera.

CIFRA NO TA BAHA

E consecuencia ta cu e cantidad di casonan no ta baha, ta stagna y ta sigui crea un preocupacion. Esaki, pasobra segun gobierno, ta a base di e cifranan aki, por determina e exito of no di e combatimento di e virus.