Segun encuesta, Aruba a perde bataya cu COVID19

ORANJESTAD – Tin un percepcion cu Aruba a ‘perde’ e bataya cu COVID19. Por lo menos segun un encuesta cu Noticiacla a conduci recientemente. E interesante ta cu mayoria cu a participa, no a keda contagia, cu ta 78%. Gobierno su definicion di ‘perde’ e bataya, ta ora cu hospital ta yen y tin cu dicidi , ‘ken ta biba y ken ta muri’. Por bisa cu percepcion den e caso aki a hunga un rol grandi, basa riba influencia di e.o. noticia y of social media. Aunke cu mayoria no a keda infecta, nan ta pensa cu Aruba a perde e bataya. Un cantidad di 587 persona a participa entre usuarionan di noticiacla. No ta pretende cu ta un representacion di henter e isla, pero ta un informacion cu ta bon pa tene na cuenta. 

E RESULTADO

Manera indica, mayoria di esnan cu a participa, y a contesta riba e pregunta pa conta nan ‘experiencia cu COVID19, a indica cu nan no a keda contagia (78%). Un grupo chikito a bisa cu nan a keda contagia pero a recupera (4.10%), un otro grupo a bisa cu nan ta contagia ainda cu e virus( 2.39%). E grupo cu a recupera ta den edad di 55-64 (7%), mientras cu e dos gruponan di (7%) 25-34 y 35-44(3%) aña di edad ta entre esnan cu ainda tin e virus. Un otro grupo mas chikito a bisa cu nan tin famia cu nan a perde cu COVID19, y e grupo aki ta 1.8%. 

TESTING

A puntra tambe di entre esnan cu a test, con nan experiencia tabata. Mayoria a bisa cu nan test a bay bon (38.73%), mientras cu 21.13% a haya e experiencia hopi bon. Un porcentahe di 3.52% a haya cu e testmento tabata hopi malo. No a duna opcion pa bisa si, pakico a haye hopi malo. 

ESNAN CU TABATIN COVID19

Entre esnan cu tabatin COVID19, sea awor of cu a cura caba, a puntra tambe con nan a experencia esaki. Gran mayoria a bisa cu nan tabata levemente malo (52.17%), mientras cu e grupo mas chikito (2.17%) cu ta un persona, a bira dje malo cu e mester a keda hospitalisa. Un total di 19.57% a bisa cu nan a bira hopi malo, pero no a keda hospitalisa. Y 26.09% a bisa cu nan no a bira hopi malo. E districto cu tabatin mas caso positivo entre esnan cu a participa na encuesta, tabata Noord, cu 4 (29%), sigui pa Oranjestad y Sta Cruz ambos cu 2 caso (21%).

PERDE BATAYA

Bek pa e punto ‘principal’, mayoria di esnan cu ta pensa cu Aruba a perde e bataya di COVID19, esaki ta varia levemente entre districtonan aunke e percentahe ta halto. Pero tin un diferencia grandi ora cu bay pa edad, unda cu 90% cu ta pensa cu a perde e bataya, ta den e edad di 18-24, mientras cu e grupo cu mas ta kere cu tin e situacion bou di control ta esun di 65 y mas halto cu ta 27%. 

FAMIA CONTAGIA

Un punto cu ta wordo hopi treci dilanti, ta e peliger cu ora cu un persona keda contagia, cu e por contagia su famia cu porta ta mas vulnerable cu e persona cu inicialmente a keda contagia. Aki tambe a haci pregunta si e persona cu a participa den e encuesta, tabatin famia cu a keda contagia, y mayoria a bisa cu no cu ta 58%, pero un grupo relativamente grandi toch, 42% a bisa cu nan famia a keda contagia cu e virus. Esaki ta un cifra toch halto, aunke nan no ta e mayoria. Pues e peticion pa evita pa si bo tin e virus, di contagia bo famia, ta hopi valido cu e cifra aki, aunke enberdad e no ta representa henter e isla.