Knops: Aruba por a haya mas placa si a sigui caminda corecto via CAFT

DEN HAAG – Ta parce cu Aruba a atende cu e ‘deficit’ repentino di 138 miyon florin den un forma robez. Asina por compronde di splicacion di secretario di estado Hulandes Raymond Knops durante su conferencia di prensa diahuebs mainta pa prensa di Aruba. Mientras cu e mandatario a refuta (un biaha mas) cu ‘Hulanda lo a adapta e condicionan di nan proposicion unilateralmente’, causando un buraco financiero. Segun Knops, si Aruba a acerca CAFT pa un evaluacion nobo di e situacion cu a surgi (debi na e retraso), lo por a presenta un plan nobo cu RMR lo por a cumpli cu ne, cu por ta mas cu e 204 miyon florin, cu a pone disponibel inicialmente. 

SORPRENDI

‘Mi tabata hopi sorprendi di e conferencia di prensa di 10 di september (2020) di e forma con e la bay”  Knops a bisa  durante e conferencia di prensa. Debi cu e no por a bishita Aruba recientemente, a opta pa tene un conferencia pa duna periodistanan chens pa haci pregunta. Y ta aki el a bolbe ripiti loke el a bisa prensa Hulandes, cu ‘Hulanda lo a adapta e condicionan di nan proposicion unilateralmente, y cu pesey Aruba a haye den problema financiero’. 

KICO A PALABRA

Knops a ripiti cu ningun momento Hulanda a actua di forma unilateral. E la bolbe splica cu loke a palabra ta cu e di tres tranche lo tuma lugar pa e lunan September, October y november. Pero pa esey sosode, mester tin un acuerdo, segun Knops. Y como cu no tabatin acuerdo ainda, no por a haci e pagonan. “Y tur esaki a wordo comunica entre partidonan riba nivel di ambtenaar” Knops a sigui bisa. “Pa bisa awor cu Hulanda unilateralmente no a tene su mes na e palabracion, no ta corecto, segun mi” Knops a sigui bisa. A reitera cu e ayudo ta bin cada bez pa tres luna, pero for di momento cu yega na un acuerdo. 

ASSESMENT DI CAFT

Segun Knops, mientras cu Aruba a reacciona si den forma di puntra Hulanda con a para cu e pago, e no a reacciona riba e part di si e por haya un bista mas actual di e situacion riba cual por basa e necesidad di likides. “Pasobra esey por tur ora. Aruba por haci un peticion na CAFT pa un assessment nobo y por acorda esaki via Rijks Minister Raad (RMR)” Knops a sigui bisa. Pues Hulanda por a adapta esaki, si a haci esaki. Pesey Knops a bisa cu e ta sorprendi riba e tono y e reclamo den direccion di Hulanda cu Hulanda no a cumpli cu su palabracion. “Nada ta menos berdad. Mi kier bisa aki atrobe cu mas lihe tin un acuerdo, mas liher Aruba cumpli cu e condicionan cu ta mara na e di tres tranche, mas liher e tranche ta bira pagabel” Knops a bisa. Y esey, pa e suma cu ta necesario. “E suma ta wordo stipula pa CAFT. Y si Aruba ta di opinion cu e suma no ta suficiente, e ora Aruba ta liber pa pidi CAFT pa haci un evaluacion nobo y presenta esaki na RMR y claro cu nos lo por duna un prestamo cu ta cumpli cu e necesidad cu tin.  

CLARIFICACION

Ademas, for di un pregunta di prensa, Knops a bolbe clarifica e situacion ora cu a papia riba e tema; “ Mi ta kere cu e pregunta tabata si ta posibel ainda pa e suma di 204 miyon cu awor ta reserva desde september, por wordo aumenta, pa tambe cubri e deficitnan eventual cu a keda incuri den lunanan di july y augustus, pa cubri esaki tambe” Knops a bisa. Riba esey, e mes a contesta su tras:” Si, esey por, pero nos ta haci esey si riba e evaluacion di CAFT y RMR”.  Cu esaki e ta refuta cu Hulanda no tabata dispuesto pa yena e buraco crea, segun minister president di Aruba. E la bisa cu ora cu a puntra Hulanda pa fia e placa extra ey, Hulanda a nenga rotundamente. Algo cu awe, Hulanda ta desmenti.