Gobierno evaluando pa introduci Ley Seco y Shelter in Place pa weekend

ORANJESTAD – Gobierno ta evaluando pa re-introduci Shelter in Place e weekend aki, y tambe ley seco. E decision lo cay pa diabierna y lo anuncia esaki e dia ey. Asina prome minister Evelyn Wever Croes a bisa durante e briefing di COVID19 diaranson anochi. Motibo ta cu medidanan cu a tuma recientemente, no a funciona aparentemente y a pone cu e siman aki atrobe e cifranan di caso positivo a aumenta den forma alarmante, y a ‘logra’ yega un record awe atrobe di 176 caso riba un solo dia. 

PROME SHELTER IN PLACE

Tabata 4 luna pasa (mei) cu gobierno a cancela e Shelter in Place cu tabata na vigor durante e prome ola. Pues esaki lo bira un ‘reintroduccion’ di e medida aki, mientras cu Ley seco ta e prome biaha cu esaki lo keda introduci, si e decision cay diabierna. 

TAPABOCA

Un otro regla nobo ta bira cu entrante diabierna awor, cu trahadonan den lugarnan paden di establecimento, tambe tin cu bisti tapaboca obligatoriamente. Prome cu awor, e tabata obligatorio solamente pa ciudadanonan cu ta drenta e establecimentonan. Esaki ta cambia y awor ta bira tambe cu esnan cu ta traha den e tienda, lo tin cu bisti e tapaboca.