Lacle: Ley di samenscholing no ta efectivo y ta mara man di polis

ORANJESTAD – Un di e medidanan cu gobierno a tuma pa combati samenscholing tin un problema pa ehecuta of mehor dicho, tin efecto. Segun vocero di polis Lito Laclé na e portal aki noticiacla, tin parti di e ley, cu ta pone cu polis no por actua corecto y multa hende cu ta kita henter e efecto di e medida. Esey ta debi cu tin un articulo den e ley cu ta complica e situacion. E caso ta cu awor polis por actua, pero nunca por duna multa of detene un hende pa e violacion di samenscholing pasobra den practica, e personanan no a viola e ley. Laga nos splica.

KICO TA E SITUACION

Manera cu e ley ta poni aworaki segun Laclé, ora cu polis yega na un sitio cu tin mas cu 5 persona of 40 persona mes, e grupo aki de facto no ta ‘violando un ley’. Nan ta viola e ley solamente unabez cu polis duna nan e ordo pa ‘hala’ di e lugar y nan no cumpli cu e orden. Y casi semper, nan ta scucha. Pero, ora cu polis bay, nan por bolbe bin hunto, p.e. un otro caminda, y aki polis atrobe por bin y hala nan. Si nan scucha, nada no ta pasa. Y asina e cos ta sigui den un forma di wega. Pues e regla no tin efecto pasobra e grupo ta sigui forma y ta kibra e esencia di e meta di e ley, cu ta ‘evita cu gruponan ta forma hunto’. 

SOLUCION

E solucion manera cu a wordo splica, ta cu mester elimina un di e articulonan aki, esta articulo 4. Pa e ley aki tin efecto, polis mester por actua asina cu nan a yega. Pues si polis yega y haya un grupo di 4 of 40 mes hunto, esey so caba ta motibo pa duna nan un multa of detene nan, pasobra nan a viola e regla di samenscholing. Laclé y otro polisnan ta sinti, cu e ley den su structura actual, no ta yuda cu e proposito y ta ‘tempo perdi’, y pesey polis ta considera nan man mara den esaki. A lo menos cu ta esey ta loke ta e meta di e crisis team.