Debi na contagio di personal pa COVID19 Arubus a cera su oficina principal

ORANJESTAD – Despues cu dos trahado di Arubus a test positivo pa COVID19, a dicidi cu entrante diaranson merdia, ta cera e oficina principal na Sabana Blanco. Den un comunicado, e compania a confirma e situacion actual y e pasonan cu nan a tuma. A bisa tambe cu mientras cu ta cera e oficina, e operacion di bus no ta para. 

E COMUNICADO

Segun e comunicado, Arubus NV tin e obligacion di informa comunidad di Aruba cu 2 di e empleadonan den nan oficinanan na Sabana Blanco a test positivo pa COVID-19. Na momento cu e empleadonan aki a cuminsa desaroya sintoma di COVID-19, nan no a presenta na trabou mas y asina drenta un cuarentena preventivo pendiente nan resultado. Awor cu e resultado ta conoci,e protocol interno pa cu COVID-19 mester keda intensifica, locual ta encera cu mester evacua e edificio y desinfecta esaki profundamente pa por reanuda servicio.

Pa loke ta transporte y e chauffeurnan, ta keda mantene e protocolnan existente di prevencion y desinfeccion na momento di haci uzo di nan servicionan. “Nos ta sigura nos usuarionan cu nos servicio di transporte publico ta continua di manera regular, como cu nos ta mantene nos protocol di limpieza riguroso den nos busnan varios biaha pa dia” e comunicado ta sigui bisa. “Nos chauffeurnan ta keda pendiente pa e usuarionan cumpli cu nos exigencianan di prevencion pa asina evita cu e virus di COVID-19 lo sigui plama.

Pa mas informacion tocante Arubus NV su protocol di siguridad y prevencion pa cu COVID-19, bishita nos website www.arubus.com”.