Reapertura di frontera cu Latino America por ta na November 2020

Reapertura di frontera cu Latino America por ta na November 2020

Posted on 09/16/2020 3:16 pm AST | Updated on 09/16/2020 3:18 pm AST

ORANJESTAD – Mientras cu no tin fecha ainda pa Aruba cuminsa ricibi buelonan for di Latino America e.o. Colombia, tin indicacion cu esaki por ta pa 1 di December 2020 proximo. Por lo menos e aeroliña Avianca ta cla pa pone Aruba riba itinerario pa e fecha ey. Interesante ta cu CEO di ATA Ronella TjinAsjoe a bisa e portal aki algun dia prome ainda, cu ta purbando pa Aruba habri e frontera cu Colombia bek pa 1 di November 2020 proximo. Pero, e situacion di COVID19 mester duna pa esey por sosode. 

PA ARUBA SO

Mester clarifica si cu cu ora papia di bula bek for di Colombia pa Aruba entrante 1 di December, cu esaki ta conta netamente pa Aruba, ya cu nan a planea caba pa e luna aki cuminsa bula pa cierto destinacionan caba. Nan ta haciendo esaki de fase, pues cada luna ta amplia e itinerario, y Aruba ta figura riba e ultimo fase parse. Pa Aruba pues, nada no ta sigur ainda. Loke ta sigur, ta cu lo no ta por lo pronto, manera a programa inicialmente. 

FECHA INICIAL

E fecha ‘inicial’ pa cuminsa bula bek pa Colombia tabata 1 di September 2020. De hecho, e aeroliñanan local y di afo tabata propaganda esaki pa basta luna. Pero e situacion di COVID19 a keda cambia, cu a forza tur hende reahusta nan itinerario. A keda hala e fecha y awe mainta e portal aki por a compronde cu e fecha ta entre 1 di November pa 1 di December. Hecho ta cu segun TjinAsjoe, lo anuncia esaki por lo menos un luna delanta (si no tin mas sorpresa cu COVID19).

ANALISIS

Segun e CEO di ATA, nan a presenta un analisis completo na autoridadnan competente pa cu un fecha. “E enfasis ta pone pa baha e cantidad di contagionan prome” TjinAsjoe a bisa. E no sa kico e cifra ‘magico’ ta (e cifra cu ta considera como suficientemente abou pa por habri bek) pero a bisa cu e ta spera cu por ‘anuncia e fecha pronto’. 

 

  • Powered by SETAR