Tasa di positividad di COVID19 ta mucho halto ainda na Aruba

ORANJESTAD – E tasa di positividad (positivity rate) na Aruba ta mucho halto segun mediconan na Aruba. Nan ta basa nan mes riba e indicacion mundial (incluyendo Aruba), cu ta bisa cu e tasa mester ta menos cu 5%. Esey ta nifica cu menos cu 5% cu a test pa COVID19, ta sali positivo. Actualmente e average di e tasa ta entre 20 cu 40% pues mucho halto. E tasa di positividad ta e cantidad di casonan positivo, compara cu e cantidad di persona cu a test. E motibo di e cifra halto segun DVG, ta debi na e cantidad di cluster halto cu tin na casnan.

TESTMENTO

E pensamento ta cu ora cu un tasa di positividad ta halto, esey kier men cu e virus a plama y ta sugeri tambe e ora cu mester haci mas test pa baha e cantidad. Problema ta cu na Aruba a pone como regla, cu no ta test si no tin simptoma, sino e test no ta mucho confiabel. Pesey ta test solamente si tin simptoma. Mester cambia e protocol aki e ora, pero esey por ta un problema debi cu no tin capacidad di personal pa hacie, y e cantidad di test lo no ta suficiente. Algun siman atras a cuminsa permiti un laboratorio priva di haci test, pero aki cos a bay fout, y a para e testmento ey tambe. Awor ta test solamente na hospital, aeropuerto, Laboratorio di Servicio, MedCare (na The Mill) y Medwork. E diferencia ta cu pa e ultimo tresnan, mester paga ya cu e no ta cubri pa AZV. Tambe por ta cu entre e cantidad di hendenan cu ta positivo, of cu tin simptoma, e grupo aki no ta yamando ‘suficiente’ pa pidi pa test. Tur esaki por ta un factor. 

CON PA BAHA E TASA

E formanan con pa baha e tasa positivo, ta pa reduci e cantidad di transmission di e virus, of manera a bisa caba, aumenta e cantidad di hende cu ta test. Ambos ta bay man den man. Si un lugar ta haciendo mas test y respondiendo apropia na e testnan positivo, pues cu esnan cu resulta positivo ta isola nan mes mesora, e cantidad di transmission lo baha cu tempo. Pero hasta sin test, medidanan estricto manera bisti masker, distanciamento social y evita gruponan grandi, ta un forma efectivo pa baha e transmission. 

SI NO TEST

E problema ta tambe ora cu hende no test. Si no tin suficiente testing, tin hende cu ta, of por ta infecta cu no ta wordo conta, y no sa cu nan tin cu isola nan mes. Como resultado, nan lo por ta responsabel pa ta plamando e virus y cu posibilidad cu por causa morto den nan comunidad. Sin testing, e virus ta haya chens pa plama silenciosamente cu tur consecuencia cu esaki por tin.