Registracion pa vuelonan humanitario  ta sigui

Registracion pa vuelonan humanitario ta sigui

Posted on 09/15/2020 2:33 pm AST | Updated on 09/15/2020 2:34 pm AST

ORANJESTAD - Durante di e ultimo lunanan gobierno di Aruba conhuntamente cu embahada di Hulandes na Venezuela y consulado di Venezuela na Aruba tabata traha duro riba intervencionnan diplomatico. 

Cu esfuersonan mutuo di parti di autoridadnan Venezolano como tambe autoridadnan na Aruba a logra realiza e prome vuelo humanitario di Regreso Boluntario pa Venezuela siman pasa.

ASISTENCIA

E asistencia cu pais Aruba ta brinda desde comienso di e programa Regreso Boluntario ta entre otro di duna informacion, haci registracion y inventarisacion di cuanto persona tin interesa den e programa y pa cua parti di mundo, mediacion cu e pais di origen y e asistencia logistico cu ta encera entre otro regel e aerolinea (cuanto vuelo, cuanto persona pa vuelo). Regreso Boluntario ta un programa di asistencia special pa esnan cu ta na Aruba y kier regresa nan pais di origen.

REGISTRACION REGRESO BOLUNTARIO

Interesadonan por inscribi via di e formulario online door di acudi na e website di DIMAS www.dimasaruba.aw y klik riba Regreso Voluntario / Vrijwillige Terugkeer / Voluntary Return. Ta importante pa yena tur e veldnan den e formulario cu informacion correcto. Esnan cu a inscribi caba no ta necesario pa bolbe yena e formulario un biaha mas. E registracion ta solamente pa personanan cu ta na Aruba cu un status legal of cu un status irregular of cu a keda pega na Aruba na momento cu e pandemia a yega y cu ta desea di regresa bek nan pais di origen.

CONTACTO

E ta importante pa e persona interesa den repatriacion ta pendiente di su telefon y di su emailadres personal como cu esakinan ta e forma con DIMAS lo comunica cu nan pa cualkier informacion.

COVID TEST

Personanan cu ta aborda e vuelonan di repatriacion por ser pidi pa haci e PCR test cu 2 dia di anticipacion. 

REGRESO ARUBA

Residentenan di Aruba pega den exterior cu ta desea di wordo considera pa un vuelo humanitario por inscribi unicamente via di e emailadres [email protected] y lo mester manda un copia di paspoort y permiso valido, hunto cu nan adres den exterior, adres di residencia na Aruba, telefon di contacto den exterior y di Aruba. Vuelonan di Regreso Aruba no ta wordo maneha door di DIMAS.

Registra pa siguiente vuelo di Regreso Boluntario for di Aruba pa exterior

Interesadonan por sigui registra via di e formulario online pa vuelonan humanitario cu ta sali for di Aruba. Na momento cu DIMAS tin informacion concreto lo sigui comunica cu e personanan cu a registra via di nan emailadres personal. Pa mas informacion of pa inscribi pa e programa di repatriacion asisti di Regreso Boluntario for di Aruba por tuma contacto cu telefon 522-1500 of bishita e website di DIMAS www.dimasaruba.aw y klik riba e tab di Vrijwillige Terugkeer / Regreso Voluntario / Voluntary Return.

  • Aruba ta raporta 91 caso positivo di COVID19 reparti entre dos dia

    Aruba ta raporta 91 caso positivo di COVID19 reparti entre dos dia

    ORANJESTAD – Entre diabierna y diasabra (aunke e cifranan ta wordo presenta e dia despues pues diadomingo den e caso ak), tabatin 91 caso positivo di COVID19 (22% positivity rate cu ta hopi!) registra, segun DVG. Diasabra tabatin un problema technico pa cual no por a haya e cifranan di e dianan ey. Diadomingo a ‘reestablece e coneccion’ y a bolbe haya cifra. No por a bisa si di e 91 casonan, cuanto manera indica, tabata di diasabra y cuando di diadomingo, aunke cu mester bisa cu e ta mas bien esnan cu a test riba diabierna y diasabra. Segun resumen por tuma nota cu 111 persona a recupera, total di activonan awo ta 1289, total di testnan haci dia 18 y 19 ta 681, di cual 407 test a wordo haci na laboratorio di hospital bou residentenan y total di caso di fayecimento relata na Covid-19 ta 23.

  • A opta pa toch no introduci Shelter in Place y of Ley Seco awor

    A opta pa toch no introduci Shelter in Place y of Ley Seco awor

    ORANJESTAD – Gobierno a dicidi pa toch no introduci e Ley Seco ni Shelter in Place debi cu e cifranan di contagion no ta duna motibo pa esaki. Asina prome minister Evelyn Wever Croes a contesta Noticiacla.com diabierna anochi durante e COVID19 briefing. Entre otro e cifra di tasa di positivo cu a baha, cu ta mustra un tendencia cu esaki ta bahando. Esey ta un indicacion hopi faborabel segun e mandatario a bisa. “E no ta caminda e mester ta pero ta bayendo den hopi bon direccion” Wever a bisa. Banda di esaki, tur otro interes, manera esun economico, turistanan na Aruba ta pone cu a opta pa no introduci e medidanan aki awor ya cu e lo por afecta e industria turistico tambe. E controlnan cu a aumenta tambe contra mal comportacion di hende tanto na trabou como cas, ta pone cu no tabata necesario pa introduci e dos medidanan cu a sugeri diaranson ultimo. Tabata diaranson cu a bisa cu lo evalua pa sea introduci tur dos medida of un di nan, y tur hende tabata pendiente pa esaki. Sinembargo pa sorpresa di hopi, esaki no a bira un realidad. Tin cu a keda contento cu e decision mientras cu otronan a keda babuca cu no a tuma e medidanan aki. 

  • Toque de Queda ta cambia di orario y ta bira mas tempran

    Toque de Queda ta cambia di orario y ta bira mas tempran

    ORANJESTAD – Mientras cu no a anuncia medidanan cu a spera di Shelter in Place y of Ley Seco, gobierno a anuncia cambio den orario di Toque de Queda cu awor ta bira mas tempran. Entrante diasabra, esaki ta bira 10’or di anochi pa 5’or di marduga. Tambe lo aumenta control pa negoshinan otro siman, mirando cu 40% di e contagio ta na pia di trabou. No ta conoci ainda pakico finalmente no a anuncia e dos medidanan menciona, manera cu a sugeri diaranson. 

  • Mas recuperacion, pero cantidad positivo di COVID19 no ta baha

    Mas recuperacion, pero cantidad positivo di COVID19 no ta baha

    ORANJESTAD – Mientras cu tin un cantidad considerable di persona (308) a recupera di e COVID19 diabierna segun DVG, e cantidad di casonan positivo diario no ta bahando. E ta subi cu mas di 20 caso compara cu un dia prome atrobe, te 78 caso positivo. Tur ta residente.  E cantidad di activo awe ta 1309, total di testnan haci ayera ta 413, di cual 303 test a wordo haci na laboratorio di hospital bou residentenan y e total di caso di fayecimento relata na Covid-19 ta keda mescos, 23.

  • Cantidad mas halto di hospitalisacion pa COVID19 registra awe pa un dia

    Cantidad mas halto di hospitalisacion pa COVID19 registra awe pa un dia

    ORANJESTAD – Diabierna mainta hospital Horacio Oduber a raporta e cantidad mas grandi di hospitalisacion riba un solo dia pa COVID19, cu ta 12. Anteriormente e cantidad mas halto pa un solo dia tabata 9. Cu esaki, e cantidad di casonan hospitalisacion ta aumenta na 45 persona, for di 37 un dia anterior. Ta menciona tambe cu 4 persona a bandona hospital den e ultimo 24 ora. E hecho ta cu tur dia un cantidad di persona ta keda interna y otronan ta sali, y esey ta nifica cu e cantidad di hospitalisacion no ta bahando, corta stop. Potret ta di archivo di noticiacla di un caso di hospitalisacion siman pasa di un pashent di COVID19 na Aruba. 

  • Aruba ta conoce otro morto di COVID19 y 54 caso positivo awe

    Aruba ta conoce otro morto di COVID19 y 54 caso positivo awe

    ORANJESTAD – Aruba ta conoce otro morto awe diahuebs di COVID19 pa un total di 23 morto awor. Mientrastanto e casonan positivo pa awe tabata 54, di cual 1 ta no residente. Total di activonan awo ta 1617, total di testnan haci ayera ta 349, di cual 280 test a wordo haci na laboratorio di hospital bou residentenan. Mientrastanto 66 persona mas a recupera. 

  • Powered by SETAR