Contesta di Hulanda no a para welga di hamber di Eman

ORANJESTAD – E contesta cu gobierno di Aruba kier a haya pa pone un fin na e impasse cu Hulanda, ainda no a yega. Por lo menos no na un nivel aceptabel pa gobierno di Aruba. Esaki ta pensamento di minister presidente interino di Aruba Mike de Meza den un conferencia di prensa diaranson atardi. E liña di comunicacion ta habri y gobierno ta para riba nan punto cu ta autonomia di Aruba. E intencion pa tin un solucion diaranson mainta, no a keda materialisa. Esey ta nifica tambe cu premier Mike Eman ta keda den su welga di hamber. “Nos no ta acepta pa ningun pais na mundo, bin kita of atrapa nos autonomia” de Meza a sigura comunidad di Aruba. E mandatario a pidi Hulanda pa refleha riba e situacion y laga pleno huicio prevalece. 

 Tabata diamars anochi despues di dos ora di negoshacion entre ministernan di gabinete Mike Eman II y gobernador, cu partidonan no a yega na otro pa un solucion pa termina e welga di hamber di premier Eman. Na final di e anochi, minister Mike de Meza a hiba palabra indicando cu ta gobierno di Aruba a haci e intento y acercamento pa por tin un posibel solucion pa tanto firmamento di e presupuesto, como fin na e welga di hamber di su colega Eman. Pero no por a keda cla ya cu loke cu gobernador mester, no por tuma lugar sin aprobacion di Hulanda. Como tal mester warda diaranson yega, pa haya reaccion di gobernantenan hulandes, prome cu por sali for di e asunto aki. Inicialmente a kere cu den cuestion di horas, por a sali afo, pero esey no a resulta e caso. Notable tambe diamars anochi tabata momento cu gobernador a bandona su despacho, cu cantidad di hende na e sitio a cuminsa grita gobernador pa traidor y otro palabranan menos nechi, mustrando nan disgusto pa cu su actuacion ultimo dianan. Pues ta keda pendiente pa diaranson mainta pa tende si e loke cu a keda proponi na gobernador, ta keda aproba pa Hulanda pa por sali for di e impasse aki. Por lo menos parti di dje, unda cu premier Eman lo por para su welga di hamber.