Rey Willem Alexander a toca ayudo financiero pa nos islanan durante troonrede

DEN HAAG – E Cu excepcion di e mencion di Aruba den casi comienso di su discurso, e unico mencion di nos islanan durante e asina yama ‘troonrede’ di Rey Willem Alexander diamars mainta, tabata e referencia na e tipo di ayudo financiero pa nos islanan y e condicion bou di cual nos por haya esaki. Ademas un confirmacion cu e ayudo humanitario ta keda disponibel. E resto tabata dedica na Hulanda. 

E DISCURSO

Tur aña riba e di tres diamars di luna di September, e Rey ta habri e aña Parlamentario di Hulanda cu su discurso real (troonrede). Mescos cu Aruba, ta un presentacion di kico a sosode den e aña actual pero mas aun, loke ta planea pa sosode den e siguiente aña parlamentario. Y tur aña tur hende ta interesa pa wak cuanto atencion nos islanan ta haya. Tin biaha ta algun palabra, y e aña aki, 3 frase. Mester bisa si, cu Aruba su nomber a cay for di comienso di e discurso e biaha aki, den cuadro di e ‘cobertura di COVID19’. “Coronavirus a afecta nos tur. For di Terschelling te Aruba!” e Rey a bisa. Despues ta sigui e discurso riba temanan Hulandes. 

E DISCURSO

Segun Rey Willem Alexander, Hulanda mester prepara su mes pa e consecuencianan di un caida fuerte economico, aunke no mester austerisa e aña proximo. De hecho, mester netamente inverti den mantencion di empleo. Y riba e punto ey, e plannan ta traha. Tin un buffer financiero cu Hulanda a crea, riba cual nan por coi e frutanan aworaki. Pero e Rey a alerta pa e temponan dificil nos dilanti. No sa con dificil, pasobra esey ta depende di con e virus ta tene e pais den su gara. 

E SITUACION DI CORONA

Debi na e medidanan di coronavirus, e aña aki e Rey no a tene su discurso den e acostumbrado Ridderzaal, sino den Grote Kerk di Den Haag. No a usa e ‘koets’ di oro, y no tabatin parade glorioso. Simplemente a transporta e pareha Real cu auto pa e sitio. Den e misa a limita e cantidad di invitado ten a 270 (envez di e casi 1000 persona cu semper ta invita). 

PARTI DI CARIBE HULANDES

E parti unda cu ta toca nos, tabata 4 frase, manera indica, unda cu a referi na e situacion actual financiero di nos islanan. A   confirma cu nos islanan a sufri grandemente di e crisis. “Ta papiando cu e islanan di Caribe Hulandes grandemente afecta, riba cua tipo di ayudo y bou di cua tipo di condicion por wordo duna. Ta e intencion pa sostene e pueblo y contribui na e siguridad economico y socio cultural di futuro. Ayudo humanitario semper ta keda disponibel” e Rey a sigui bisa. POr lesa e discurso completo AKI.