Mal comportacion di weekend ta obliga gobierno actua cu man duro awor

ORANJESTAD – E comportacion malo di un grupo di hende den weekend (primordialmente na beach) lo por nifica actuacion cu man duro proximamente. Oficialmente, prome minister di Aruba Evelyn Wever dialuna durante conferencia di prensa di gobierno, riba pregunta di noticiacla, a contesta cu e ta ‘hopi decepciona’ cu e comportacion di un grupo di persona cu e fin di siman a como si fuera laga nan sentido comun na cas y a comporta nan mes nada positivo. Esaki por tin consecuencia pa cu e e virus COVID19. Inoficialmente, a compronde cu den fin di siman e prome mandatario ‘a flip’, ora cu el a nota e comportacion aki. Y ta algo sigur di compronde.

KI IDIOMA PA PAPIA

E mandatario a sigui bisa cu e no sa mas ki idioma pa papia pa splica nos comunidad di e situacion. “Mi ta kere cu aworakinan mester gewoon actua cu man duro!” Wever a sigui bisa. “Anto esey ta loke nos kier a evita” e prome mandatario a sigui bisa. “Loke nos a mira den fin di siman tabata hopi decepcionante, y e ta mustra claramente un comportacion hopi irresponsabel di un grupo di hende” Wever a bisa, sigurando cu e gran mayoria, si ta tene nan mes na regla. Pero e consecuencia por ta cu aworaki hunto cu e crisis team, lo tin cu dicidi pa tuma accion dirigi netamente riba e aspect di beach y cu por encera limitacion severo di esey.