Grupo di ciudadano a ‘lubida’ nan sentido comun na cas den weekend

ORANJESTAD – Ta parce cu e fin di siman aki un grupo di ciudadano di Aruba ( y posiblemente di otro lugar) a dicidi di sali fo’i cas y laga nan sentido comun na cas. Esaki mirando e comportacion di e grupo aki rond Aruba. Nada di distanciamento social, y comportacion cu ta contradictorio di loke e mester ta den tempo di e crisis di COVID19. Beachnan tabata yen, polis cu man na cabez pa restaura e trankilidad y seguridad. Y accidentenan cu ta tuma lugar di tal forma cu ta ‘compromete’ hospital su capacidad pa cu COVID19. Tabatin sigur uno unda cu hasta motor di auto a keda tira riba caya. Asina duro e accidente tabata, pa no corda mes riba esnan cu a keda pega den auto. Tur ta casonan cu por termina den hospital of mas pio, ICU cu ta limita caba. Varios caminda durante fin di siman polis mester a actua pa asina mustra e ciudadanonan riba nan ‘sentido comun’ pero parce cu esaki no tabata yuda. Hasta durante e detencionan  cu a cay, esnan deteni tabata reta polis cu nan sa ‘miho’. E comportacion aki, lo por nifica cu aki un pa dos siman, nos lo ta yen  di casonan positivo atrobe di COVID19, of simplemente sigui registra cifranan mucho halto na e nivel aki (casi dos luna despues cu e di dos ola a cuminsa na augustus ultimo). No ta conoci si gobierno lo actua riba esaki e siman aki. A duna dos siman di tempo (for di siman pasa diaranson) pa wak si e cifranan di COVID19 por baha, sino lo anuncia 3 siman di medida di lockdown. Potret di Facebook.