Discusion AVP -MEP pakico a saca Wever for di Comision Integridad Reino

ORANJESTAD – E union entre e parlamentarionan di Aruba durante e reunion interparlamentario di Reino no a dura largo. Mientras cu e reunionnan tabata terminando awe, ambos partido a mustra nan rabia riba e asunto di candidatura di Evelyn Wever den comision di Reino pa integridad. Mes lihe cu e la wordo apunta, e la wordo baha. Despues cu awe mainta e decision a cay pa retira su candidatura for di e comision, ambos partido a saca nan comunicado pa splica nan posicion.

PAKICO A SACA WEVER

Segun e lider di fraccion di partido AVP Rene Herde, apenas dos dia despues cu e lider di MEP a wordo apunta pa bira e representante di parlamento di Aruba den e comision di "integridad" di parlamentonan di Reino, e mes un delegacion di parlamento mester a dicidi di retir'e for di e posicion aki. E motibo segun AVP ta, cu for di momento cu e lider di MEP a haya e funcion, el a cuminsa haci politica partidista cun'e. Den e funcion e lo mester a traha hunto cu miembronan di otro parlamentonan di e cuatro paisnan di Reino, pa haci inventarisacion di maneho necesario pa stimula integridad den gobernacion na tur nivel y den tur e cuatro paisnan di Reino. Segun AVP, envez di cuminsa concentra riba esaki, e lider di MEP a cuminsa ataca hende y crea e impresion cu e ta e persona mas integro den politica na Aruba. “Loke a haci cu a bira imposibel pa mantene e lider di MEP den e funcion ey, tabata e articulo cu a sali den prensa diabierna”.

REACCION MEP

Partido MEP ta mustra cu e miedo ta grandi cu Lider di MEP den e Comision ey por desenmascara tur e escandalo nan di partido AVP. Ademas, partido AVP no kier tende di e leynan cu mester wordo introduci pa controla financiamento di partidonan politico, ni di screening di minister. Hustamente e leynan aki Evelyn Wever-Croes a anuncia cu e lo traha duro riba nan pa nan bin, pero no ta cumbini AVP, ni esnan cu ta financia AVP, pa e leynan aki bin.” Pesey AVP mester a hasi tur lo posible pa stroba e candidatura di Evelyn Wever-Croes den e comision ey.” Segun MEP, riba e ultimo dia di IPKO nan a logre. Baba Herde sin consulta, a dicidi di saca Evelyn Wever-Croes y pone Marlon Sneek, algo cu a cai manera un bom den e reunion, especialmente cerca e delegacion di Hulanda. Nan ta mustra cu e delegadonan di Hulanda aparentemente tabata bon na altura di e escandalo nan rondo di Marlon Sneek cu accidentenan straño y dudoso den trafico y su incontinencia debil. Lider di MEP Evelyn Wever a comenta riba e asunto aki.

EVELYN WEVER

"Cu hopi entusiasmo mi a cuminsa ehecuta mi trabounan den e Comision di Integridad di Reino, y ya nos a reuni un biaha caba den e comision. Pero mi por a pensa cu den seno di partido AVP, nan tabata tin hopi problema cu e nombracion aki, pasobra nunca nan a permiti MEP ta den comisionan asina. Y na final nan a logra saca mi di e comision. Pero esaki lo no stroba mi den mi meta y esey ta pa Aruba haya un gobierno integro, pasobra Aruba merece mihor", Wever-Croes a bisa.

RENE HERDE

Según e lider di fraccion di AVP, Rene Herde, Wever den e funcion lo mester a traha hunto cu miembronan di otro parlamentonan di e cuatro paisnan di Reino, pa haci inventarisacion di maneho necesario pa stimula integridad den gobernacion na tur nivel y den tur e cuatro paisnan di Reino. “Envez di cuminsa concentra riba esaki, e lider di MEP a cuminsa ataca hende y crea e impresion cu e ta e persona mas integro den politica na Aruba. Loke a haci cu a bira imposibel pa mantene e lider di MEP den e funcion ey, tabata e articulo cu a sali den prensa diabierna den cua ta crea e impresion cu e reunion e siman aki di parlamentarionan di Reino, lo a conclui cu gobernador di Aruba tabata tin motibo pa interveni aña pasa den gobernacion di Aruba” Herde a sigui bisa. Pa resto di e delegacion di Aruba esaki tabata dimas y prome cu e reunion a cuminsa diabierna mainta a dicidi cu ta remplasa e lider di MEP den e funcion di representante di Aruba den e comision di "integridad". E articulo ta un mentira completo, pasobra no a ni discuti e tema aki den e reunion e siman aki.” Herde a finalisa bisando.