Temporada di horcan 2020 ya a surpasa pronostico cu 4 tormenta

MIAMI/ORANJESTAD – E siman aki ta habri laman Atlantico cu no menos cu 5 sistema tropical di cual 4 tin nomber. Dos tormenta tropical (Sally y Teddy), dos depression tropical (Rene, #21) y un horcan, Paulette. E temporada di horcan 2020 ya a surpasa e pronostico annual cu no menos cu 4 tormenta. A pronostica 9 pa 15 tormenta cu nomber (nos ta na #19). Y ainda falta 10 siman di e temporada, y apenas 2 nomber mas cu ta Vicky y Wilfred. Ta un seguridad cu lo tin cu ripiti e situacion manera 2005, unda cu a surpasa e 21 nombernan alfabetico y resorta na nombernan griego. Na 2005 a surpasa esaki caba y mester a usa 6 nomber griego pa por a cumpli cu e cantidad record di 31 tormenta cu nomber. Ainda falta mitar di September, luna di October y November completo (temporada ta caba 30 di November oficialmente).